Dhule Riot News : सांगवीतील दंगलीनंतर आदिवासी युवकांवर अन्याय होत असल्याचे सांगत विविध आदिवासी संघटनांतर्फे शुक्रवारी धुळे येथे मोर्चाचे आयोजन केले होते. मात्र, मोर्चाला परवानगी नाकारल्याने निवडक पदाधिकाऱ्यांनी जिल्हाधिकारी व पोलिस अधीक्षकांच्या कार्यालयात जाऊन निवेदन दिले.

त्यात म्हटले आहे, की सांगवी येथे विश्व आदिवासी दिनानिमित्त आदिवासी क्रांतिकारकांच्या प्रतिमा असलेले बॅनर्स १० ऑगस्टला चारण समाजातील लोकांनी फाडले. त्याबाबत विचारणा करण्यासाठी गेलेल्या आदिवासींना चारणांनी जातिवाचक शिवीगाळ करून बेदम मारहाण केली. त्यात तीन जण गंभीर जखमी झाले. (Officers demanded CBI inquiry in Sangvi riots dhule news)

सांगवी (ता. शिरपूर) येथील दंगल नियंत्रणासंदर्भात पोलिसांचे वर्तन आक्षेपार्ह असून, या दंगलीची ‘सीबीआय’तर्फे चौकशी करावी, शिरपूर उपविभागाचे पोलिस उपअधीक्षक सचिन हिरे व सांगवी पोलिस ठाण्याचे सहाय्यक निरीक्षक जयेश खलाणे यांची बदली करावी, आदिवासी युवकांवरील गुन्हे मागे घ्यावेत, अशा मागण्या विविध आदिवासी संघटनांच्या पदाधिकाऱ्यांनी शुक्रवारी (ता. १८) जिल्हाधिकारी व पोलिस अधीक्षकांना निवेदन देऊन केल्या.

• त्यांच्यावर धुळे येथे उपचार सुरू आहेत. या प्रकरणी संशयितांवर पोलिसांनी तातडीने गुन्हे दाखल करणे आवश्यक होते. मात्र, त्यांच्यावर दंगलीच्या दुसऱ्या दिवशी गुन्हे दाखल करण्यात आले. मुख्य संशयिताचे नाव ‘एफआयआर’मधून वगळले आहे. पोलिसांची ही कृती संशयास्पद असून, त्यांनी समयसूचकता न दाखविल्याने दंगल उसळून अनर्थ घडला.

हेही वाचा : Credit Card फसवणूक....काय घ्याल काळजी?

दंगलीनंतर निर्दोष आदिवासी युवकांना लक्ष्य करून त्यांच्यावर गुन्हे दाखल करण्यात येत आहेत. त्यामुळे समाजात अस्वस्थता पसरली. पोलिस राजकीय दबावाखाली काम करीत असल्याची भावना वाढीस लागली आहे.

त्यामुळे पोलिस उपअधीक्षक हिरे व सहाय्यक निरीक्षक खलाणे यांची तातडीने बदली करावी, दंगलीची सीबीआय चौकशी करावी, खरे गुन्हेगार हुडकून काढावेत आणि युवकांवरील गुन्हे मागे घ्यावेत, अशा मागण्या भिल समाज विकास मंचाचे संस्थापक अध्यक्ष दीपक अहिरे, जिल्हा सचिव अशोक सोनवणे, बिरसा फायटर्सचे नाशिक विभागीय अध्यक्ष विलास पावरा, जिल्हाध्यक्ष वसंत पावरा, तालुकाध्यक्ष ईश्वर मोरे यांनी केल्या.