Dhule News : धुळे जिल्ह्यातील शिक्षकांच्या प्रलंबित मेडिकल बिल तसेच रजा रोखीकरणाच्या बिलांसाठी शिक्षण विभागाकडून अतिरिक्त बीडीएस उपलब्ध करून देण्यात आला असून, ही बिले ऑफलाइन पद्धतीने देण्यास परवानगी मिळाल्यामुळे शिक्षकांचा मागील चार वर्षांपासून प्रलंबित मेडिकल बिलांचा प्रश्न मार्गी लागला आहे. (problem of teachers medical bill leave encashment is solved dhule news)

यासाठी महाराष्ट्र टीचर्स असोसिएशनच्या राज्याध्यक्षा शुभांगी पाटील यांचे प्रयत्न यशस्वी झाले आहेत. त्यामुळे शिक्षकांत समाधान व्यक्त होत आहे.

मेडिकल व रजा रोखीकरण बिले अतिरिक्त बीडीएस उपलब्ध नसल्याने मागील गेल्या सुमारे तीन ते चार वर्षांपासून प्रलंबित होती. महाराष्ट्र टीचर्स असोसिएशनच्या राज्याध्यक्षा शुभांगी पाटील यांचा सुरवातीपासूनच शिक्षणाधिकारी, वेतन अधीक्षक यांच्याकडे पाठपुरावा सुरू होता. पण शासनाकडून ऑफलाइन पद्धतीने बिल देण्यासाठी आदेश होत नव्हते, तसेच पगाराव्यतिरिक्त इतर कोणत्याही बिलांसाठी अतिरिक्त बीडीएस उपलब्ध होत नव्हता.

हेही वाचा : संतुलित आहारातून रोखा फॅटी लिव्हरचा आजार

शुभांगी पाटील यांनी शिक्षण उपसंचालक, शिक्षण संचालक व मंत्रालय येथे पाठपुरावा केला. हा प्रश्न धुळे जिल्ह्यासह जळगाव, नंदुरबार व अन्य जिल्ह्यांतही प्रलंबित होता.

गेल्या तीन ते चार वर्षांपासून महाराष्ट्र टीचर्स असोसिएशनतर्फे जिल्हास्तरापासून ते थेट मंत्रालयापर्यंत अनेक वेळा पाठपुरावा केल्यावर शिक्षण विभागाकडून मेडिकल बिलांसाठी, रजा रोखीकरणासाठी अतिरिक्त बीडीएस उपलब्ध करून देण्यात आला तसेच ही बिले ऑफलाइन पद्धतीने देण्यास परवानगी दिली.

"शिक्षक किंवा त्यांच्या कुटुंबातील सदस्यांचा आजाराप्रसंगी रुग्णालयात रोखीने पैसा दिला जातो. पण तो पैसा परत मिळण्यासाठी तसेच मुख्याध्यापक व शिक्षकेतर कर्मचाऱ्यांना रजा रोखीकरणाचे पैसे मिळण्यासाठी चकरा माराव्या लागल्या. त्यांपैकी काही कर्मचाऱ्यांचे पैसे न मिळता कोरोनात निधनही झाले. आता हा प्रश्न सुटल्याने कर्मचाऱ्यांनी आनंद व्यक्त केला असून, अनेकांनी मोबाईलद्वारे आभार मानले आहेत." -शुभांगी पाटील, राज्याध्यक्षा, महाराष्ट्र टीचर्स असोसिएशन