तळोदा : सरदार सरोवर प्रकल्पबाधित शेतकऱ्याने खेडले (ता. तळोदा) शिवारात दिलेली ०.९२ आर जमीन ताब्यात द्यावी, अन्यथा जमीन कब्जा आंदोलन करण्यात येईल, असा इशारा दिला होता. त्यावर तातडीने कार्यवाही करत तळोदा तहसील कार्यालयाने खेडले शिवारातील जमीन प्रकल्पबाधित शेतकऱ्याला ताब्यात दिली आहे. त्यामुळे प्रकल्पबाधित शेतकऱ्याला पावसाळ्यापूर्वी दिलासा मिळाला आहे.

सरदार सरोवर प्रकल्पबाधित खाल्या दमण्‍या वसावे (रा. सिंदुरी, ता. अक्कलकुवा) यांना खेडले येथे सर्वे क्रमांक ३५/२ मधील ०.९२ आर शेतजमीन दिली होती. मात्र, शेतजमिनीवर दुसऱ्याचे अतिक्रमण असल्याचे निवेदन ३१ मेस तळोदा तहसीलदारांना दिले होते. त्या निवेदनात २ जूनपर्यंत जमीन ताब्यात न मिळाल्यास ३ जूनला जमीन कब्जा आंदोलन करण्यात येईल, असा इशारा दिला होता.

दरम्यान, दुसरीकडे महसूल विभागाने खाल्या वसावे यांना २८ ऑगस्ट २०१६ ला शेतजमीन ताब्यात दिली होती व जमिनीवर अतिक्रमण होणार नाही, याची काळजी घेण्याचे सूचित करून जबाब नोंदविला होता. मात्र, निवेदनाद्वारे माहिती कळल्याने तहसीलदार गिरीश वखारे, पोलिस निरीक्षक केलसिंग पावरा, उपनिरीक्षक अमितकुमार बागूल, नायब तहसीलदार शैलेंद्र गवते, भूकरमापक रोहित मालपुरे, मंडलाधिकारी मराठे, तलाठी योगेश गावित यांनी शेतात जाऊन अतिक्रमण करणाऱ्यांना समज दिली व पंचांसमक्ष खाल्या वसावे यांना जमिनीचा ताबा मिळवून दिला. खाल्या वसावे यांच्यातर्फे त्यांचा मुलगा मादाऱ्या खाल्या वसावे यांना ताबा देण्यात आला. महसूल विभागाने केलेल्या तत्पर कार्यवाहीमुळे प्रकल्पबाधितांनी आभार मानले. वाद टाळण्यासाठी जमिनीची मोजणी करून देय असलेल्या जमिनीचे सीमांकन करून मिळावे, अशी अपेक्षा प्रकल्पबाधितांनी व्यक्त केली आहे. काल्या पाडवी, लालसिंग पाडवी, चंद्रसिंग तडवी, सोदया वसावे, पारता तडवी, राज्या वसावे व इतर प्रकल्पबाधित या वेळी उपस्थित होते.