शिरपूर : इंग्रजीचा पेपर देण्यासाठी तयारी पूर्ण झालेली असतांना अचानक वडिलांचे निधन झाले. संपूर्ण कुटुंबावर दु:खाचा डोंगर कोसळला. पण कर्तव्यपूर्तीची उर्मी उसळून आली. पित्याचा मृतदेह घरात ठेवून तो अत्यंत गांभीर्याने परीक्षेला सामोरा गेला. पेपर देऊन आल्यावर मुलाचे कर्तव्य बजावत त्याने वडिलांचे अंत्यसंस्कार केले. मन सुन्न करणारी ही घटना तालुक्यातील विखरण गावात घडली आहे.

विखरण (ता.शिरपूर) येथील भाऊसाहेब झुलाल पवार (वय 50) यांचे सोमवारी (ता.6) पहाटे आकस्मिक निधन झाले. त्यांचा मुलगा हर्षल दहावीच्या वर्गात असून त्याचा सोमवारी इंग्रजी विषयाचा पेपर होता. घरात वडिलांचा मृतदेह असतांना पेपरला कसा जाऊ म्हणून त्याच्या मनाची चलबिचल सुरु झाली. मात्र घरातील मंडळी व नातलगांनी त्याला धीर देत आधी विद्यार्थ्याचे कर्तव्य बजावण्यास सांगितले.

घरातून तो निर्धारित वेळेत साने गुरुजी विद्यालयातील परीक्षा केंद्रावर पोचला. दरम्यान त्याच्यावरील आपत्तीची माहिती शिक्षकांनाही मिळाली होती. त्यांनीही हर्षलचे सांत्वन करुन त्याला धीर दिला. पेपर पूर्ण सोडवून तो घरी पोहचला. त्यानंतर भाऊसाहेब पवार यांची अंत्ययात्रा काढून अंत्यसंस्कार करण्यात आले.