Nandurbar News : महिला व बालविकास विभागामार्फत राबविण्यात येणाऱ्या क्रांती ज्योती सावित्रीबाई फुले बालसंगोपन योजनेंतर्गत १ एप्रिल २०२३ पासून दोन हजार २५० प्रमाणे वाढीव दराने अनुदान वितरित करण्यात येत असल्याची माहिती जिल्हा महिला व बालविकास अधिकारी राजेंद्र बिरारी यांनी दिली.(Subsidy of child care scheme at increased nandurbar news )

केंद्रीय बाल न्याय अधिनियम (मुलांची काळजी व संरक्षण) आणि महाराष्ट्र राज्याचे बाल न्याय (मुलांची काळजी व संरक्षण) नियमानुसार अनाथ, एकल पालक, दुर्धर आजार, निराधार, कैद्यांची बालके व संरक्षणाची गरज असलेल्या ० ते १८ वयोगटातील मुला-मुलींना संस्थेत दाखल करण्याऐवजी पर्यायी कुटुंब उपलब्ध करून

देऊन कौटुंबिक वातावरणात त्यांचे संगोपन व विकास घडवून आणणे हा बालसंगोपन योजनेचा उद्देश आहे. निकषात बसणाऱ्या एका कुटुंबातील दोन बालकांना या योजनेचा लाभ १८ वर्षांपर्यंत देण्यात येईल. पालकाचे वार्षिक उत्पन्न दोन लाख ५० हजारांपेक्षा कमी असावे.

येथे संपर्क साधावा

सर्व बालविकास प्रकल्प अधिकारी कार्यालये, सर्व अंगणवाडीसेविका, मुख्य सेविका, सर्व तालुका संरक्षण अधिकारी कार्यालये, सखी वन स्टॉप सेंटर जिल्हा रुग्णालय, नंदुरबार, चाइल्ड हेल्पलाइन-१०९८, ६८/२, प्लॉट क्रमांक ३५ ब, सूर्यवंशीनगर, शासकीय वैद्यकीय मुलांच्या वसतिगृहाच्या बाजूला, नंदुरबार, जिल्हा बाल संरक्षण कक्ष, प्रशासकीय इमारत कक्ष क्रमांक २२६ टोकर तलाव रोड, नंदुरबार, संजीवनी आदिवासी महिला मंडळ संचलित बालसंगोपन योजना, शिक्षक कॉलनी, जिजामाता रोड, नंदुरबार.

योजनेसाठी सादर करावयाची कादपत्रांची यादी या कार्यालयांमध्ये उपलब्ध आहे. या योजनेच्या लाभासाठी व अधिक माहितीसाठी संबंधित कार्यालयाशी संपर्क साधावा व जास्तीत जास्त पात्र लाभार्थ्यांनी योजनेचा लाभ घ्यावा, असे आवाहन जिल्हा महिला व बालविकास अधिकारी राजेंद्र बिरारी यांनी केले आहे.

बालसंगोपन योजनेसाठी पात्रता

-अनाथ किंवा ज्यांच्या पालकांचा पत्ता लागत नाही व जी बालके दत्तक देणे शक्य नाही अशी बालके, कामगार विभागाने प्रमाणित केलेले बालकामगार.

-एका पालकाचा मृत्यू, घटस्फोट अशी एकल पालक बालके.

-कुष्ठरोग, एचआयव्ही, कॅन्सर, जन्मठेपेची शिक्षा भोगत असलेले कैदी, तुरुंगात असलेले, दोन्ही पालक दिव्यांग अशा पालकांची बालके.

-तीव्र गतिमंद, एचआयव्ही, कॅन्सर, पॉक्सो अनिधनिमांतर्गत बळी पडलेली व दुर्धर आजार असलेली बालके.

-कोविड-१९ मुळे दोन्ही पालक गमावलेले, नैसर्गिक आपत्तीमुळे एक किंवा दोन्ही पालक गमावलेली व विधिसंघर्षग्रस्त बालके.

-भिक्षेकरी गृहात दाखल असलेली भिक्षेकरी पालकांची बालके.