Dhule Fake Doctors : बोगस वैद्यकीय व्यवसाय प्रकरणी धुळे मुख्य न्यायदंडाधिकाऱ्यांनी एका बोगस डॉक्टरला दोन वर्षे कारावास व दंडाची शिक्षा सुनावल्याने बोगस डॉक्टरांचे धाबे दणाणले आहे. (Two years imprisonment for fake doctor dhule news)

धुळ्यातील शहर पोलिस ठाण्यातील पोलिसांनी जुलै २०१८ मध्ये धुळ्यातीलच साक्री रोड, रिमांड होमजवळ साई समर्थ क्लिनिक येथे छापा टाकून बोगस वैद्यकीय व्यवसाय करणाऱ्या संशयित संजय शांताराम महाले यांच्याविरुद्ध गुन्हा दाखल केला होता.

तपासणी होऊन न्यायालयात आरोपपत्रही दाखल झाले. त्यात संशयित दोषी ठरून मुख्य न्यायदंडाधिकारी वैभव कुलकर्णी यांनी महाराष्ट्र वैद्यकीय व्यवसाय अधिनियमानुसार संशयित महाले यास दोन वर्षे सश्रम कारावास व दोन हजार रुपये दंड आणि दंड न भरल्यास दोन महिने साध्या कैदेची शिक्षा.

तसेच भारतीय दंडविधानाच्या एका कलमानुसार पुन्हा सहा महिने सश्रम कारावास व दोन हजार रुपये दंड व दंड न भरल्यास दोन महिने साध्या कैदेची शिक्षा ठोठावली. खटल्यात सहाय्यक सरकारी वकील राकेश प्र. चौधरी यांनी आठ साक्षीदार तपासले.

उच्च व सर्वोच्च न्यायालयाचे निवाडे दाखल करून सरकार पक्षाची बाजू भक्कमपणे मांडली. त्यांना सहाय्यक संचालक व सरकारी अभियोक्ता संजय मुरक्या यांचे मार्गदर्शन लाभले.

शहर पोलिस ठाण्याचे तपास अधिकारी हवालदार रवींद्र बेडसे व पोलिस निरीक्षक आनंद कोकरे यांचे सहकार्य लाभले. दरम्यान, अनेकदा गुन्हे दाखल होऊनही पुन्हा त्याच गावी व ठिकाणी अनेक वर्षांपासून अनधिकृत वैद्यकीय व्यवसाय करणाऱ्या बोगस डॉक्टरांचे या निकालाने धाबे दणाणले आहे.