नंदुरबार : शेतातील वीज जोडणीसाठी रजाळे (ता.नंदुरबार) येथील शेतकऱ्याकडून २७ हजार पाचशे रूपयाची लाच स्वीकारताना वीज वितरण कंपनीचा वायरमनसह खासगी पंटराला लाच लुचपत प्रतिबंध विभागाने रंगेहाथ पकडले आहे.

रजाळे (ता.नंदुरबार) येथील शेतकऱ्यास कृषी वीज पंपासाठी वीज जोडणी करायची होती. त्यासाठी शेतकऱ्याने नंदुरबार वीज वितरण कार्यालयाकडे ऑक्टोबर २०२१ ला वीज जोडणी मागणी अर्ज ऑनलाइन भरला आहे. त्यानंतर डिमांड नोट मिळावी म्हणून वारंवार चकरा सुरू होत्या. शेवटी रजाळे येथे नियुक्तीस असलेले वीज वितरण कंपनीचे वायरमन (तंत्रज्ञ) अनिल मांगडू भोये याने रजाळे गावातील खासगी वायरमन असलेला देवानंद पंडित मराठे याच्यामार्फत शेतकऱ्याकडून ३० हजाराची लाच मागितली होती. शेवटी तडजोडीअंती शेतकऱ्याने २७ हजार पाचशे रुपये देण्याचे निश्‍चित झाले. त्यात १५ हजार रुपये डिमांड नोट रक्कम व १२ हजार पाचशे लाचेचा समावेश आहे. दरम्यान, या बाबत संबंधित शेतकऱ्याने लाच लुचपत प्रतिबंध विभागाकडे तक्रार केली. त्यानंतर आज रक्कम देण्याचे निश्‍चित केले. त्यानुसार आज लाच लुचपत प्रतिबंध विभागाने सापळा रचला. त्यानंतर खासगी वायरमन देवानंद मराठे यांच्यामार्फत २७ हजार पाचशे रुपये स्वीकारताना लाच लुचपत प्रतिबंध विभागाने मराठे व मांगडू भोये या दोघांना रंगेहाथ पकडले. दोघांविरुद्ध पोलिसात गुन्हा दाखल करण्यात आला असून दोघांना अटक केले आहे.

लाचलुचपत प्रतिबंध विभागाचे उपअधीक्षक राकेश चौधरी, पोलिस निरीक्षक समाधान वाघ, पोलिस निरीक्षक माधवी वाघ, हवालदार विलास पाटील, विजय ठाकरे, अमोल मराठे, देवराम गावित, ज्योती पाटील, श्री. नावाडेकर, मनोज अहिरे, जितेंद्र महाले यांच्या पथकाने ही कारवाई केली.