चंद्रपूर : महाघातक अशा कोरोना विषाणू विरुद्धच्या लढाईत मोलाची कामगिरी बजावणाऱ्या जिल्ह्यातील १६ हजार ६९ आरोग्य कर्मचाऱ्यांना लसीकरण मोहिमेच्या पहिल्या टप्प्यात कोरोना प्रतिबंधात्मक लस देण्यात येणार आहे. यात शासकीय तसेच खासगी रुग्णालयातील आरोग्य अधिकारी व कर्मचारी, रोजंदारीवर काम करणारे कर्मचारी, एकात्मिक बालविकास प्रकल्पातील अधिकारी व कर्मचारी यांचा समावेश आहे.
जिल्ह्यात कोरोना प्रतिबंधक लस साठवण्याची क्षमता पुरेशा प्रमाणात असून एकूण ८० शितसाखळी केंद्रे आहे. कोरोना लसीकरणासाठी जिल्हा आरोग्य प्रशासनाने मायक्रोप्लान तयार केला असून, त्याच्या तयारीचाच भाग म्हणून जिल्ह्यातील वैद्यकीय अधीक्षक, तालुका आरोग्य अधिकारी, वैद्यकीय अधिकारी, सहायक वैद्यकीय अधिकारी, सामुदाय आरोग्य अधिकारी, बालविकास प्रकल्प अधिकारी, आरोग्य सहायक, आरोग्य पर्यवेक्षक, अंगणवाडी पर्यवेक्षिका यांचा समावेश असलेल्या ६३७ जिल्हा व तालुकास्तरावरील अधिकारी व कर्मचाऱ्यांचे ऑनलाइन प्रशिक्षण १८ डिसेंबरला पूर्ण करण्यात आले.
कोरोना प्रतिबंधक लसीकरणासाठी जिल्हाधिकारी अजय गुल्हाने यांच्या मार्गदर्शनात मुख्य कार्यकारी अधिकारी राहुल कर्डिले यांच्या प्रमुख उपस्थितीत व जिल्हा आरोग्य अधिकारी डॉ. राजकुमार गहलोत, जिल्हा शल्यचिकित्सक डॉ. निवृत्ती राठोड, उपमुख्य कार्यकारी अधिकारी (महिला व बालविकास) संग्राम शिंदे यांच्या हस्ते प्रशिक्षण कार्यक्रमाचे उद्‌घाटन करण्यात आले.
जिल्हा लसीकरण अधिकारी डॉ. संदीप गेडाम, सहायक जिल्हा आरोग्य अधिकारी डॉ. प्रकाश साठे, जिल्हा हिवताप अधिकारी डॉ. प्रतीक बोरकर, निवासी वैद्यकीय अधिकारी (बाह्यसंपर्क) डॉ. हेमचंद किन्नाके, वैद्यकीय अधिकारी प्रशिक्षण पथक डॉ. प्रीती राजगोपाल, जागतिक आरोग्य संघटनेचे प्रतिनिधी डॉ. मोहम्मद साजिद, यू.एन.डी.पी.चे विभागीय अधिकारी अश्विनी नागर, यू.एन.डी.पी.चे जिल्हा प्रतिनिधी गणेश धोटे यांच्याकडून प्रशिक्षण देण्यात आले.
कोरोना प्रतिबंधक लसीकरणाच्या दुसऱ्या टप्प्यात पोलिस, सुरक्षा दल, नगरपालिका व महानगरपालिका अधिकारी व कर्मचारी यांचा समावेश असणार आहे. तिसऱ्या टप्यात ५० वर्षांवरील नागरिक आणि व्याधीग्रस्त नागरिकांचा समावेश आहे. लसीकरणाची पूर्वतयारी करण्यात आलेली असून ज्या प्रमाणात लस उपलब्ध होईल, त्याप्रमाणे लसीकरण केले जाणार आहे.
संपादन ः राजेंद्र मारोटकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.