अमरावती ः अचानक विजेचा दाब वाढून घरातील लाइट फुटले. त्यामुळे आग लागून आगीत नऊ महिन्यांची मुलगी गंभीररीत्या जळाल्यामुळे उपचारादरम्यान तिचा जिल्हा सामान्य रुग्णालयात गुरुवारी (ता 11) मृत्यू झाला.

या घटनेमध्ये मृत मुलीच्या पित्यासह एक युवक असे दोघेही जखमी झाले. जखमींवर जिल्हा सामान्य रुग्णालयात उपचार सुरू आहेत. कुलावंती सुभाष कास्देकर (वय 9 महिने) असे मृत मुलीचे नाव आहे. या घटनेत कुलावंती हिचे वडील सुभाष कास्देकर (वय 35) व त्यांचा भाचा रोशन कंदिरकर (वय 17 दोघेही रा. टाकी, जि. बैतुल, मध्यप्रदेश) हे जखमी झाले आहेत. 

महाशिवरात्रीनिमित्त दर्शनासाठी गेले, आंघोळ केली अन् आईच्या डोळ्यासमोरच बुडाला एकुलता एक मुलगा

बुधवारी (ता. दहा) रात्री साडेआठच्या सुमारास टाकी गावात ही घटना घडली. श्री. कास्देकर यांच्याकडे किराणा दुकान आहे. दुकानातील लाइट फुटून आग लागली. त्यात चिमुकली कुलावंती ही 80 टक्के, वडील सुभाष हे 2 टक्के तर, रोशन हा 20 टक्के भाजल्या गेले. तिघांनाही बुधवारी रात्रीच उपचारासाठी अमरावतीच्या जिल्हा सामान्य रुग्णालयात दाखल करण्यात आले. 

उपचारादरम्यान गुरुवारी (ता. 11) कुलावंती हिचा मृत्यू झाला. असे जिल्हा सामान्य रुग्णालयातील पोलिस चौकीतील कर्मचाऱ्यांनी सांगितले. इर्वीनमधील पोलिसांनी घटनेची माहिती मध्यप्रदेशच्या भैसदेही पोलिसांना दिली.

संपादन - अथर्व महांकाळ