यवतमाळ : जिल्ह्यात डेंगीचा प्रादुर्भाव कमी झाला असला, तरी ऑक्‍टोबर महिन्यात 19 रुग्ण आढळून आलेले आहेत. आतापर्यंत एकूण 93 रुग्ण आढळले असून, हिवताप विभागाने या भागांत प्रत्यक्ष भेट देवून पाहणी केली आहे. विशेष म्हणजे रुग्ण आढळून आले असले तरीदेखील डेंगीने होणाऱ्या मृत्यूचे प्रमाण कमी झाले आहे.

दरवर्षी, पावसाळ्यात डेंगी आजाराच्या रुग्णांमध्ये वाढ होते. त्याअनुषंगाने प्रशासनाकडून उपाययोजना केल्या जातात. नागरिकांकडून सहकार्य मिळत नसल्यामुळे डेंगी रुग्णांच्या संख्येत वाढ होत असल्याचे समोर आले आहे. गेल्या वर्षी जानेवारी ते डिसेंबरदरम्यान जिल्ह्यात 494 डेंगीग्रस्त रुग्ण आढळून आले होते. यंदा जानेवारी ते ऑक्‍टोबर महिन्यापर्यंत 93 रुग्ण आढळले आहेत. जिल्ह्यातील 281 गावे अतिसंवेदनशील आहेत. असे असले तरी यंदा डेंगीचा प्रादुर्भाव कमी करण्यात हिवताप विभागाला यश आले आहे.

हेही वाचा - सततच्या पावसामुळे सोयाबीनला शेंगा फुटल्याच नाही, मग निराश शेतकऱ्याने पिकात फिरवला...

डेंगीसाठी अतिसंवेदनशील असलेल्या गावांमध्ये यवतमाळ शहरी भागातील 21, सावरगाव 51, मेटीखेडा 19, नांझा 45, पहूर 13, मांगकिन्ही 12, बोरी अरब 31, हरसुल 36, रामपूर 24, बोरगाव 29, असे मिळून 281 गावे अतिसंवेदनशील आहेत. या गावात हिवताप विभागाच्या वतीने नियमित तपासणी करण्यात आली. अत्यावश्यक असलेल्या ठिकाणी टेमिफॉस्टची फवारणी करण्यात आली असून, डेंगी न होण्याच्यादृष्टीने आवश्यक असलेल्या उपाययोजनांबाबत जनजागृती करण्यात येत आहे. 

हेही वाचा - एवढाच काय तो दिलासा, टाळेबंदीत राज्यातील प्रदूषण पातळी...

खासगीतील माहितीस विलंब -
यवतमाळ शहरातील काही खासगी रुग्णालयातसुद्धा डेंगीचे रुग्ण आढळून येतात. या रुग्णांची माहिती हिवताप विभागाला नियमितपणे देणे बंधनकारक आहे. परंतु, खासगी रुग्णालय ही माहिती देण्यास विलंब करीत असल्याचे समोर आले आहे. अशास्थितीत प्रादुर्भावाची माहिती येण्यात अडचणी येत आहेत.