वाशीम : जिल्ह्यात दिवसेंदिवस महानगरांतून येणार्‍यांची संख्या वाढत आहे. तर दुसरीकडे स्थानिक युवक कामांअभावी बेरोजगार आहेत. त्यातच आता महानगरांतून मजुरांचे लोंढेच्या लोंढे गावाकडे परतत आहेत. त्यामुळे स्थानिक पातळीवर बेरोजगारीच मोठ्या प्रमाणावर वाढ होत आहे. कारण, जिल्ह्यात उद्योग-धंद्यांचा अभाव आहे. तसेच उन्हाळा असल्यामुळे शेतीची कामे सुद्धा बंद आहेत. त्यामुळे भविष्यात बेरोजगारीचे संकट गडद होण्याची चिन्हे दिसत आहेत.

दिवसेंदिवस राज्यभरात कोरोना बाधितांच्या संख्येत भर पडत आहे. त्यामुळे कामानिमित्त बाहेर गेलेले नागरिक घराकडे परत येत आहेत. त्यामुळे अशा नागरिकांना कुठल्याही प्रकारचे लक्षणे नसली तरी सुद्धा त्यांची आरोग्य तपासणी करून त्यांना 14 दिवसांकरिता गृहविलगीकरणात ठेवले जात आहे. तसेच या नागरिकांकडून गृहविलगीकरणाचे उल्लंघन होणार नाही, याकडे ग्रामसमितीच्या माध्यमातून लक्ष दिल्या जात आहे. मात्र, स्थानिक पातळीवर उद्योग धंद्यांचा अभाव आहे. तालुक्याच्या ठिकाणचे औद्योगीक क्षेत्र ओस पडलेले आहेत. 

आवश्यक वाचा - ट्रकमधून येत होती दुर्गंधी; नागरिकांनी थांबवून पाहणी केल्यास समोर आले धक्कादायक चित्र

जिल्ह्याच्या ठिकाणी बोटावर मोजण्याइतपत लघू उद्योग सुरू आहेत. त्यामुळे स्थानिक पातळीवरीलच बेरोजगारांकडून असलेली रोजगाराची मागणी पूर्ण होत आहे. त्यातच आता महानगरांतून कामानिमित्त गेलेले लोंढेच्या लोंढे गावाकडे परत येत आहेत. मात्र, हाताला कामच मिळणार नसल्यामुळे पुढील दिवस कसे काढायचे? याची चिंता या मजुरांना लागली आहे. कारण, सध्या उन्हाळा असल्यामुळे शेतीची कामे सुद्धा बंद आहेत. त्यामुळे ग्रामीण भागात आता मोठ्या प्रमाणावर बेरोजगारीत वाढ होणार असल्याचे दिसून येत आहे.

हेही वाचा - वाह! याला म्हणताता वेळेचा सदुपयोग, तो पण चक्क शाळेत क्वारंटाईन केलेल्या व्यक्तींकडून...वाचा

अशी आहे स्थिती
गृह विलगीकरण ............57
संस्थात्मक विलगीकरण.....17
आयसोलेशन कक्षात .......06
तपासलेले एकूण नमुने ...102
पॉझिटिव्ह अहवाल.........03
निगेटिव्ह अहवाल .........94
अहवाल अप्राप्त ........... 05

बाधित रुग्णाची प्रकृती स्थिर
कारंजा येथील दोन व महानगरांतून आलेल्या तीन रुग्णांचे ‘स्वॅब’ नमुने आज (ता.15) तपासणीसाठी पाठविले आहेत. तसेच आयसोलेशन वॉर्डमध्ये उपचार घेत असलेल्या कोरोना बाधित रुग्णाची प्रकृती स्थिर आहे.
-डॉ. अंबादास सोनटक्के, जिल्हा शल्य चिकित्सक, वाशीम

कोरोना बाधिताची प्रकृती स्थिर
जिल्हा सामान्य रुग्णालयातील आयसेलेशन वॉर्डमध्ये कोरोना बाधित एका रुग्णावर उपचार सुरू आहेत. सध्या या रुग्णाची प्रकृती स्थिर असल्याची माहिती जिल्हा शल्य चिकित्सकांनी दिली आहे.