करजगाव (जि. अमरावती) : शेकडो भक्तांचे श्रद्धास्थान असलेल्या श्रीक्षेत्र बहिरम येथील दरवर्षीप्रमाणे यावर्षीसुद्धा विधिवत पूजाअर्चा करण्यात आली. दरवर्षी २० डिसेंबरला याठिकाणी पूजाअर्चा करण्यात येते. यावर्षी कोरोनाच्या पार्श्‍वभूमीवर यात्रा बंद असल्याने याठिकाणी मोजक्‍या पदाधिकाऱ्यांच्या उपस्थितीत अत्यंत साध्या पद्धतीने हा सोहळा पार पडला. 

बहिरमबाबाच्या मूर्तीला शेंदूर, दूध, दही, सहद व लोण्याचा अभिषेक करण्यात आला. विधिवत पूजेनंतर मंदिरासमोरील यज्ञात पूर्णाहूती देण्यात आली. होमहवनानंतर आरती करून रोडग्याचा नैवद्य बहिरमबाबाला दाखवण्यात आला. दरवर्षी या यात्रेला हजारो भाविक दर्शनाला येतात. विदर्भातच नव्हे तर संपूर्ण महाराष्ट्रात ही यात्रा परिचित असल्याने भक्तमंडळी सलग दीड महिना याठिकाणी बहिरमबाबाच्या दर्शनाला येतात.

जाणून घ्या - कल्पना सुचली अन् छतावर फुलविली पालेभाज्यांची बाग; घरीच मिळतो रसायनमुक्त भाजीपाला

परंतु यावर्षी कोरोनाच्या पार्श्‍वभूमीवर ही यात्रा बंद असल्याने भक्तांचा चांगलाच हिरमोड झाला आहे. रविवारी (ता. 20) बहिरम बुवाच्या महापूजेला सुरुवात झाली. शिवमंदिर, हनुमान मंदिर, महागणपती मंदिर याठिकाणी अभिषेक करण्यात आला. सामाजिक अंतर राखून कोरोनाच्या नियमांचे तंतोतंत पालन करून याठिकाणी पूजा झाली. 

सामूहिक जेवण व स्वयंपाकाला बंदी
बहिरम यात्रा व आजूबाजूच्या परिसरात कोरोनाच्या पार्श्‍वभूमीवर सर्व खबरदारी घेण्यात येत आहे. सर्वप्रकारच्या स्वयंपाकाला व सामूहिक कार्यक्रमांना याठिकाणी बंदी आहे. कोणत्याही नियमांचे उल्लंघन केल्यास संबंधितांवर नियमानुसार योग्य ती कारवाई करण्यात येईल.  
- सचिन परदेशी,
प्रभारी ठाणेदार, शिरजगावकसबा

मंदिरात फक्त दुरूनच मुखदर्शन
कोरोनाच्या पार्श्‍वभूमीवर यात्रा यावर्षी बंद आहे. परंतु मंदिरात फक्त दुरूनच मुखदर्शन घेता येते. भक्तांनी सर्व नियमांचे पालन करून मुखदर्शन घ्यावे व प्रशासनाला आणि मंदिर समितीला सहकार्य करावे. 
- सुरेंद्र चौधरी,
अध्यक्ष, बहिरम बाबा संस्थान