गुमगाव (नागपूर) : कोरानाचे संकट डोक्‍यावर ठाण मांडून असताना आणि नागरिकांचे नोकरी-व्यवसाय ठप्प पडलेले असतानाच आगीच्या घटनाही अधूनमधून सत्व परीक्षा घेत आहेत. काही ध्यानीमनी नसताना गुमगाव येथील झोपडपट्टी परिसरात दोन घरांना अचानक आग लागली. आणि घरात होते नव्हते ते सगळे आगीच्या भक्ष्यस्थानी पडले.
सकाळची चूल पेटली तर संध्याकाळचे काय आणि रात्री पो टात दोन घास गेले तर उद्याचे काय? अशी स्थिती असलेल्या या नागरिकांचे सगळेच आगीत स्वाहा झाले आहे. आता खायचे काय आणि शिजवायचे तरी कशात? असा प्रश्‍न या मंडळींपुढे उभा राहिला आहे. या आगीमुळे दोन जणांचे संसार उघड्यावर आले आहेत. घरातील संसारोपयोगी वस्तू जळून खाक झाल्या आहेत. ही घटना सोमवारी दुपारी साडेबारा वाजताच्या सुमारास घडली. सुदैवाने यामध्ये कोणतीही जीवितहानी झाली नाही.

सविस्तर वाचा - अल्पवयीन मुलीचे अपहरण करून चौघांनी पाजली दारू, पुढे काय झालं वाचा...

सुरेश सहारे यांच्या घराला अचानक लागलेल्या आगीने लगतच्या चैतराम दूधकवर यांच्या घराला सुद्धा आगीने वेढा घातला. आगीने तात्काळ विक्राळ रूप घेतल्याने परिसरात आगीचे लोळ उठले होते. हा परिसर दाट लोकवस्तीचा असल्याने नागरिकांमध्ये भीतीचे वातावरण निर्माण झाले होते. शेवटी गावकऱ्यांच्या प्रयत्नाने आग नियंत्रणात आली. कोरोनाच्या संकटकाळात आगीमध्ये दोन्ही घरातील कित्येक संसारोपयोगी साहित्य,धान्य,कपडे,भांडी जळाल्याने सहारे आणि दुधकवर कुटुंबियांच्या पायाखालची जमीनच सरकली आहे. दोन्ही कुटुंबीयांनी शासनाकडून ताबडतोब नुकसान भरपाईची मागणी केली आहे.