बेलोरा (जि. अमरावती) : चांदूरबाजार तालुक्‍यात असलेल्या एका गावातील युवतीचे दीक्षित नांदणे या 23 वर्षीय युवकासोबत बरेच दिवसांपासून प्रेमप्रकरण सुरू होते. परंतु नंतर प्रियकराच्या डोक्‍यात प्रेयसीबद्दल विनाकारण शंका यायला लागल्या. त्याने आपल्या प्रेयसीला "तुझा कोणी दुसरा बॉयफ्रेण्ड आहे काय?' असा प्रश्‍न विचारून मानसिक त्रास दिला. हा त्रास असह्य होऊन पीडित युवतीने अखेर आत्महत्या केली. 

पीडित युवतीच्या पित्याने चांदूरबाजार पोलिस ठाण्यात आरोपी दीक्षित नांदणे याच्याविरुद्ध तक्रार दाखल केली. या तक्रारीत त्यांनी म्हटले आहे की, माझ्या मुलीसोबत दीक्षित नांदणे याने खऱ्या अर्थाने प्रेम न करता केवळ प्रेमाचे नाटक केले. त्यानंतर तिच्याशी "ब्रेकअप' घेतला. "तुझा कोणी दुसरा बॉयफ्रेण्ड आहे काय?' अशा प्रकारचे प्रश्‍न विचारून त्याने मानसिक त्रास दिल्यामुळेच माझ्या मुलीने गळफास घेऊन आत्महत्या केली, असा आरोप मृत युवतीच्या पालकांनी चांदूरबाजार पोलिस ठाण्यात दाखल तक्रारीत केला आहे. 

अवश्य वाचा- तीन महिन्यांची गर्भवती माहेरी आली अन् लोटा घेऊन शौचास गेली, पुढे...

आत्महत्येपूर्वी पीडित युवतीने स्वत:च्या हस्ताक्षरात एक चिठ्ठी लिहून ठेवली होती. ती पोलिसांनी जप्त केली आहे. त्यात दीक्षित नांदणे याने प्रेमात दगा दिला. त्याच्या त्रासामुळेच मी आत्महत्या करीत आहे अशा आशयाचा मजकूर असल्याचे, तपास अधिकारी सहायक पोलिस निरीक्षक पंकज दाभाडे यांनी सांगितले. तक्रारीवरून पोलिसांनी आरोपी दीक्षित नांदणे याच्याविरुद्ध गुन्हा दाखल केला आहे. मात्र, सोमवारपर्यंत (ता. 22) त्याला अटक करण्यात आली नव्हती.