दिग्रस (जि. यवतमाळ) : लग्नाचा मुहूर्त दुपारी 12 वाजता ठरलेला असताना वऱ्हाडी उशिरा पोहोचले. आधी मंगलाष्टके की, नवऱ्या मुलीचा ऑनलाइन पेपर, यावर वधूसह नातेवाईक विवंचनेत सापडले. नवरदेवदेखील बोहल्यावर चढण्याच्या प्रतीक्षेत असताना आधी पेपर सोडवायचा आणि नंतर विवाह सोहळा पार पाडायचा, असा निरोप पाठविला. नवरदेवाकडील मंडळींनीही तत्काळ होकार भरला. मेहंदी लागलेल्या हाताने नवऱ्या मुलीने आधी ऑनलाइन पेपर सोडविला. त्यानंतर दोघेही बोहल्यावर चढले आणि मंगलाष्टकांचा सूर वऱ्हाडींच्या कानावर पडला.

हेही वाचा - मृत्यू जवळ येताना दिसताच 'त्यांनी' घेतला महत्वाचा निर्णय; प्रेरणादायी काम...

दिग्रस येथील सारिका अरुण शिखरे हिचा विवाह अमरावती येथील नीलेश साबळेसोबत गुरुवारी (ता.24) दुपारी 12 वाजता आयोजित करण्यात आला होता. विवाहाचा मुहूर्त टळून गेल्यावर अमरावतीवरून वऱ्हाडी दुपारी दीडच्या दरम्यान पोहोचले. नवरदेव तयारी करून मारोतीच्या पारावर पोहोचला व दर्शन घेऊन लग्नमंडपात आला. लग्नाला आधीच दोन तास उशीर झाला. त्यामुळे पाहुणे मंडळीला मंगलाष्टकांची प्रतीक्षा होती. पेपरची वार्ता मंडपात पोहोचली. सर्वांनीच पेपर होईपर्यंत थांबणे पसंत केले. नवरीने आनंदाने आपल्या वर्गमैत्रिणींसोबत ऑनलाइन पेपर सोडविला, नंतरच ती बोहल्यावर चढली. दोन्हीकडील मंडळींनी शिक्षणाला दिलेले महत्त्व बघता कौतुक होत आहे.

हेही वाचा - Success Story: केली अवघ्या १५ हजारांची गुंतवणूक अन् झाले कोटींचे मालक; युवा...

क्षणाचाही विलंब नाही -
सारीकाचा बीएस्सी अ‌ॅग्रीकल्चरच्या सहकार विषयाचा ऑनलाइन पेपर दुपारी दोन ते 2.40 वाजेपर्यंत असल्याचा निरोप पाठविण्यात आला. आधी पेपर सोडवू, नंतर विवाह सोहळा पार पाडू, असा निरोप देण्यात आला. क्षणाचाही विलंब न करता नवरदेवासह नातेवाइकांनी पेपर सोडविण्याला संमती दिली. सारीकाने पेपर सोडविला. त्यानंतर ती बोहल्यावर चढली.