अमरावती ः येथील हमालपुऱ्यात करण बारच्या गल्लीत चिडविण्याच्या वादातून सख्या चुलतभावाचा खून करण्यात आला. रविवारी (ता. 14) सकाळी साडेदहाच्या सुमारास ही घटना घडली. कैलास मोहन अजबे (वय 38, रा. हमालपुरा) असे खून झालेल्या व्यक्तीचे नाव आहे.

राजापेठ पोलिसांनी याप्रकरणी सुनील माणिक अजबे (वय 36), रेणुका सुनील अजबे (वय 31) व सुनीलची आई रुख्मा माणिक अजबे (वय 62, सर्व रा. हमालपुरा) या तिघांविरुद्ध खुनाचा गुन्हा दाखल केला, असे पोलिस निरीक्षक मनीष ठाकरे यांनी सांगितले. 

हेही वाचा - ‘मुलांनो, आम्हाला माफ करा; आमचे मृतदेह मेडिकल कॉलेजला दान करा’ अशी चिठ्ठी लिहून दाम्पत्याची...

शनिवारपासून (ता.13) परस्परांना डिवचण्याच्या कारणावरून सुनील व कैलास या चुलतभावांमध्ये वाद सुरू झाला. सुनीलच्या आईने राजापेठ ठाण्यात आदल्या दिवशीच्या वादाची तक्रार केली होती. त्यानंतर शनिवारी सायंकाळी पुन्हा एकाच परिसरात राहणाऱ्या या दोघांमध्ये शाब्दिक चकमक व झटापट झाली. 
एकमेकांना शिवीगाळ केली. 

आज रविवारी सकाळी पुन्हा सुनील व कैलास या दोघांमध्ये वाद सुरू झाला. कैलासच्या घरासमोर साडेदहाच्या सुमारास सुनील, त्याची पत्नी व आई असे तिघे जण आले. आधी त्या दोघांमध्ये झटापट झाली. सुनीलच्या पत्नीने कैलासच्या डोक्‍यावर लोखंडी बत्त्याने वार केला. त्यामुळे जमिनीवर कोसळलेल्या कैलासच्या छातीत सुनीलने चाकू खुपसला, असा आरोप आहे. पोलिसांनी गंभीर जखमी कैलास याला तत्काळ जिल्हा सामान्य रुग्णालयात दाखल केले. मात्र, उपचारादरम्यान कैलासचा काही मिनिटांतच मृत्यू झाला. 

हमालपुऱ्यात खुनाच्या घटनेनंतर या गल्लीत जमाव जमला. मृत कैलासची पत्नी कांचन कैलास अजबे हिच्या तक्रारीवरून राजापेठ पोलिसांनी सुनील, त्याची पत्नी रेणुका व आई रुख्मा अशा तिघांविरुद्ध गुन्हा दाखल करून त्यांना अटक केली. झटापटीमध्ये खुनाचा गुन्हा दाखल झालेला सुनीलही जखमी झाला. 

हेही वाचा - जेवणासाठी बाहेर गेलेल्या मुलाची २८ दिवासांनी फक्त मिळाली कवटी; टी-शर्ट बघताच आईने...

क्षुल्लक कारणावरून दोघांमध्ये सुरू असलेला वाद हत्येसाठी कारणीभूत ठरला. हत्या केल्यानंतर रक्ताने भरलेला चाकू सुनीलने येथील सार्वजनिक विहिरीत फेकला.
-मनीष ठाकरे, 
पोलिस निरीक्षक, राजापेठ ठाणे.

संपादन - अथर्व महांकाळ