राजुरा (जि. चंद्रपूर): मध्य चांदा वन विभागाअंतर्गत राजुरा, विरुर वनपरिक्षेत्रातील नरभक्षी वाघाला जेरबंद करण्यासाठी वेगवेगळे प्रयोग करण्यात आले. वनविभागाची रणनीती वाघाला समजल्याने वाघानेही मार्ग बदलले आहेत. आता वाघाला जेरबंद करण्यासाठी वनविभागाच्या पथकासोबत ड्रोन व स्निपर डॉग गस्त घालणार आहे. दरम्यान, वनविभागाच्या नवनवीन प्रयोगांना वाघोबा हुलकावणी देत असल्यामुळे अधिकारी व कर्मचारी हतबल झाले आहेत.

नरभक्षी वाघाला जेरबंद करण्यासाठी शेतकऱ्यांनी आंदोलन केले. त्यानंतर वनविभागाने वाघाला पकडण्यासाठी मोहीम हाती घेतली. नरभक्षी वाघाच्या शोधात वनविभागाची चमू जंगलात तळ ठोकून आहे . 200 कर्मचारी, 160 कॅमेरे, डॉक्‍टर, शूटर, पीआरटी पथक गस्त घालत आहे.  आतापर्यंत वेगवेगळे प्रयोग वन विभागाने केले. मात्र, हे सर्व प्रयोग वाघाच्या हुशारीमुळे फसलेले आहेत. आता वाघाचा सुगावा घेण्यासाठी वनविभागाने प्रशिक्षित डॉगस्कॉडमधील 'स्निपर डाग' व 'ड्रोन'ची मदत घेतली आहे.

हेही वाचा - ‘चल ऑटोमध्ये फिरून येऊ’ असे म्हणत केले अपहरण; पैसे मिळणार नसल्याचे बघून मावशीच्या घराजवळ दिले सोडून

मागील आठवड्यापासून स्निफर डॉग व ड्रोनच्या मदतीने जंगल पिंजून काढण्यात येत आहे. मात्र, नरभक्षी वाघानेही आपले मार्ग बदलले असल्याची माहिती समोर येत आहे. वाघाच्या नेहमीच्या मार्गावर ड्रोन गस्त घालत आहे. वनविभागाच्या रणनीतीचा सुगावा वाघाला लागलेला आहे. त्यामुळे तोही सावधगिरीने जंगलात फिरत आहे. राजुरा वनपरिक्षेत्राअंतर्गत चारही बाजूने पथकाने वेढले असल्याची माहिती आहे. 

हेही वाचा - ...अन् शोकाकुळ नातेवाईक मृतदेह विसाव्यावर सोडून सैरावैरा पळू लागले

राजुरा व विरुर वनपरिक्षेत्रात दहा शेतकरी व शेतमजुरांचा बळी घेणारा नरभक्षी वाघ अजूनही मोकाट आहे. त्यामुळे राजुरा तालुक्‍यातील दोन्ही वनपरिक्षेत्रतील शेतकरी दहशतीखाली आहे. परिसरातील शेतकऱ्यांचा खरीप हंगाम अंतिम टप्प्यात आहे. सणासुदीचे दिवस असल्यामुळे शेतावर जाणे व पिकाची काळजी घेतल्याशिवाय शेतकऱ्यांकडे पर्याय नाही. मात्र, वाघाच्या दहशतीमुळे शेतकरी हवालदिल झाला आहे.