चंद्रपूर : वैद्यकीय महाविद्यालय व रुग्णालयातील ५०० कोविड योद्धे कामगारांनी ७ महिन्यांचा थकीत पगार व दोन वर्षांपूर्वी लागू झालेले किमान वेतन देण्यात यावे, या मागण्यांसाठी जिल्हाधिकारी कार्यालयासमोर मागील ५५ दिवसांपासून डेरा आंदोलन सुरू केले आहे. राज्य शासनाने पगार देण्याबाबत निर्णय घेतलेला नाही. उलट कामगारांना कामावरून कमी करण्याची धमकी वैद्यकीय महाविद्यालय प्रशासनाने नोटीसीतून दिली आहे. 

हेही वाचा - कोरोनाचे ‘सुपर स्प्रेडर’ बघायचे? चला नागपूरला; उपराजधानीतील बाजारात लोकांचा बेदरकारपणा

राज्य शासनाने कामगारांचे थकीत वेतन न दिल्याने त्यांच्या कुटुंबीयांवर उपासमारीची वेळ आलेली आहे. यापूर्वीच प्रदीप खडसे व संगीता पाटील या दोन कामगारांचा थकीत पगार व मानसिक तणावामुळे मृत्यू झालेला आहे. अशात वैद्यकीय महाविद्यालय प्रशासनाने आपत्ती व्यवस्थापन कायद्याचा आधार घेत कामावरून कमी करण्याची नोटीस बजावली आहे. सुरक्षारक्षक, कक्षसेवक, सफाई कामगार इत्यादींच्या नावासह एक यादी 3 एप्रिलच्या रात्री शासकीय रुग्णालयातील अपघात विभागाच्या बाजूला असलेल्या मेट ऑफीस समोर लावण्यात आली. आंदोलनकर्त्या कामगारांनी २४ तासांच्या आत कामावर रुजू व्हावे, अन्यथा त्यांना कामावरून काढण्यात येईल, असा धमकीवजा इशारा या नोटीसमध्ये देण्यात आलेला आहे. 

हेही वाचा - Success Story : शेतकरीपुत्र झाला उपनिरीक्षक; पालवाडी येथील रोशन राऊतचे प्रयत्न फळाला

दरम्यान, वैद्यकीय महाविद्यालय प्रशासनाच्या या नोटिसबद्दल जनविकास कामगार संघाचे अध्यक्ष पप्पू देशमुख तसेच आंदोलनातील कामगारांनी संताप व्यक्त केलेला आहे. जिल्ह्यात कोरोना रुग्णांची संख्या वाढत असताना वैद्यकीय महाविद्यालय प्रशासन पगार देण्याबाबत ठोस निर्णय घेत नाही. मात्र, कामगारांना कामावरून काढण्याची धमकी देत आहे. वैद्यकीय महाविद्यालय प्रशासनाची मुजोरी खपवून घेणार नाही, असे पप्पू देशमुख यांनी म्हटले आहे.