गोंडपिपरी (जि. चंद्रपूर) : सकाळी लवकर उठायचे आपली पूर्ण कामे आटोपून आठ वाजता नगरपंचायत गाठायची अन् मग हातात माईक घेऊन जागृती संदेश देत निघायचे. दुपारी दीड ते दोन पर्यंत जेवण करायचे अन् पुन्हा काम सुरू सात वाजेपर्यंत. गेले दहा दिवस तो निरंतरपणे हे काम करतोय गळा सुकला, पण पठ्ठ्याने हिंमत हारली नाही. म्हणतो, हे काम नोकरी म्हणून नाही तर जनसेवा म्हणून करतो आहे.

कोरोना व्हायरसने जगभरात अक्षरशः थैमान घातले आहे. राज्यात कोरोनाचे सर्वाधिक रुग्ण असल्याने प्रचंड चिंतेचे वातावरण आहे. अशात लोकांनी घराराबाहेर पडू नये, यासाठी प्रशासनाकडून जागृती मोहीम सुरू आहे. गोंडपिपरीतील रमेश कुमरे हे नगरपंचायतीत शिपाई म्हणून काम करतात. पण सध्या ते चर्चेत आले त्यांच्या निरंतरपणे कोरोनाशी मुकाबला करणाऱ्या जागृती संदेशामुळे. 

कोरोना व्हायरसला रोखण्यासाठी प्रशासनाने कंबर कसली आहे. जिल्हा प्रशासन नागरिकांमध्ये जागृती करण्यासाठी विविध उपक्रम राबवित आहे. याचाच एक भाग म्हणून गोंडपिपरी नगरातही जागृती केली जात आहे. रमेश कुमरे यांना नगरपंचयातीने जागृती संदेशाची जबाबदारी दिली. ती जबाबदारी कुमरे केवळ नोकरी म्हणून नाही, तर अशा संकटकाळात जनसेवा म्हणून करीत आहेत. सकाळी आठ ते सायंकाळी सातपर्यंत नगरातील गल्ल्यागल्यांत ते माईकद्वारे सातत्याने संदेश देत आहेत.

गेले दहा दिवस त्यांचा हा संदेशाचा प्रवास निरंतरपणे सुरू आहे. वारंवार बोलल्याने त्यांचा गळा सुकला आहे. पण या  पठयाने हिंमत हारली नाही. कोरोनाला हरविण्याची आम्हा सर्वांची जबाबदारी आहे. त्यामुळे गळा सुकला तरी निरंतरपणे आपले काम सुरूच ठेवणार असल्याचे कुमरेंनी सकाळशी बोलताना सांगितले.

- या शहरातील चक्‍क नऊ डॉक्‍टरांना केले क्वारंटाईन, हे कारण ठरले कारणीभूत..

कोरोनाच्या लढाईत प्रशासनातील विविध यंत्रणा खूप मेहनत घेत आहेत. अशावेळी नगरपंचायतीच्या एका शिपायाचा हा लढाही अतीशय महत्त्वपूर्ण ठरला आहे.

आपण कोरोनाला हाकलून लाऊ शकतो
कोरोनावर मात करू शकतो. समाजातील प्रत्येक घटक जागृत राहिला व शासनाच्या निर्देशांचे पालन केले तर आपण कोरोनाला हाकलून लाऊ शकतो. कोरोनावर मात करण्याचा हाच उत्तम मार्ग आहे. गेल्या दहा दिवसांपासून शंभर तास मी हाच संदेश देत फिरत आहे.
- रमेश कुमरे, गोंडपिपरी