अमरावती : शहरातील एका महाविद्यालयात शिकणाऱ्या विद्यार्थिनीसह मोलमजुरी करणाऱ्या विवाहितेवर अत्याचार झाल्याच्या दोन वेगवेगळ्या घटना घडल्या. प्रकरणी राजापेठ पोलिसांनी शुक्रवारी, 13 मार्च रोजी अल्पवयीन युवक आणि एक अनोळखी व्यक्ती अशा दोघांविरुद्ध गुन्हा दाखल केला आहे. 

पीडित विद्यार्थिनी बाहेर जिल्ह्यातील रहिवासी असून, काही वर्षांपासून अमरावती शहरात शिकायला आहे. तिच्या बालपणीचा अल्पवयीन मित्र शहरातच शिकतो. तो भाड्याच्या खोलीत राहतो. दोघेही शहरात शिकायला असल्यामुळे त्यांच्या भेटीगाठी वाढल्या. त्यानंतर अल्पवयीन मित्राने पीडितेला आपल्या खोलीवर बोलावून तिच्यावर जबरीने अत्याचार केला होता, असा आरोप पीडितेने मूर्तिजापूर (जि. अकोला) ठाण्यात दाखल तक्रारीत केला आहे. शिवाय तिला अनेकदा मोबाईलवरून मॅसेज पाठवून तो त्रास देत होता. घटनास्थळ आयुक्तालयातील राजापेठ हद्दीतील असल्याने मूर्तिजापूर पोलिसांनी हा तपास राजापेठ पोलिसांकडे वर्ग केला. त्यात शुक्रवारी (ता. 13) अल्पवयीन मित्राविरुद्ध गुन्हा दाखल करण्यात आला. 

अवश्य वाचा- एकाने केला बलात्कार, दुसऱ्यानेही सोडली नाही संधी...

जास्त मजुरी मिळवून देण्याची मारली थाप

विवाहितेचे अपहरण करून तिच्यावर अत्याचार केल्याचा दुसरा एक गुन्हा गुरुवारी (ता. 12) रात्री राजापेठ पोलिस ठाण्यात दाखल करण्यात आला. पीडित महिला (वय 31) एका हॉटेलमध्ये मजुरीचे काम करते. काम आटोपून ती दुपारी घराकडे परत जात असताना एका अनोळखी दुचाकीस्वाराने तिला गाठले. दहा हजार रुपये महिना मजुरी देऊन काम मिळवून देतो, अशी बतावणी करून त्याने तीचे अपहरण केले. राजहिलनगर येथील एका पडिक घराच्या परिसरात नेऊन जबरीने त्या अनोळखी व्यक्तीने अत्याचार केला, असा आरोप पीडित महिलेने राजापेठ ठाण्यात दाखल तक्रारीत केला. पोलिसांनी या प्रकरणी गुन्हा दाखल केला आहे.