वणी (जि. यवतमाळ) : वेकोलिकडून उद्योगधंद्यांना अनुदानावर कोळसा वितरित केला जातो. मात्र, हा कोळसा लघुउद्योगांसाठी न वापरता खुल्या बाजारात विकला जात असल्याचे उघडकीस आले आहे. वणी पोलिसांनी अनुदानित कोळसा भरलेले तीन ट्रक लाल पुलिया परिसरातील कोल डेपोवरून जप्त करून सात जणांना ताब्यात घेतले आहे. या प्रकरणात आणखी मोठे मासे गळाला लागण्याची शक्‍यता वर्तविण्यात येत आहे. 

हेही वाचा - नाना पटोलेंना ऊर्जा मंत्रीपद तर नितीन राऊतांकडे विधानसभेचे अध्यक्षपद? राजकीय वर्तुळात...

देशातील लघुउद्योगाला चालना मिळावी यासाठी शासनस्तरावरून अल्प दरात कोळसा पुरविला जातो. लघुउद्योग करणारे व्यावसायिक हजारो टन कोळशाची खरेदी वेकोलिकडून करतात आणि तो अल्प दरातील कोळसा उद्योगात न वापरता त्याची खुल्या बाजारात विक्री करीत आहेत. यातून त्यांच्याद्वारे शासनाची फसवणूक करून वेकोलिला लाखो रुपयांचा चुना लावण्याचे काम सतत सुरू आहे. नागपूर येथील प्राइड मेटल इंडस्ट्रीजला निलजई कोळसा खाणीतून अल्प दरात कोळसा वितरित करण्यात आला होता. वेकोलितून प्रत्येकी २४ टन कोळसा भरलेले ३ ट्रक नागपूरला जाण्याकरिता निघाले होते. मात्र, हे वाहन नागपूर येथे न जाता वणीलगत असलेल्या लाल पुलिया परिसरातील ३ कोल डेपोवर कोळसा खाली करीत असल्याची गोपनीय माहिती ठाणेदार वैभव जाधव यांना मिळाली. त्यावरून डी. बी. पथकाचे प्रमुख पीएसआय गोपाल जाधव, सूदर्शन वानोळे, सुधीर पांडे, सुनील खंडागळे, पंकज उंबरकर यांनी छापा टाकत कोळसा डेपोवर खाली होणारी वाहने जप्त केली. या प्रकरणी ७ जणांना ताब्यात घेतले असून कसून चौकशी सुरू आहे. वृत्त लिहीपर्यंत गुन्हा दाखल करण्याची प्रक्रिया सुरू होती. 

हेही वाचा - International Sleep Day: कोरोनाशी लढण्याचं बळ मिळवायचयं? मग घ्या सुखाची आणि शांत झोप  

'तो मी नव्हेच' 
लघु उद्योगाचा कोळसा सातत्याने खुल्या बाजारात विकला जात आहे. शासनाला चुना लावून अनेक कोळसा व्यावसायिक गब्बर झाले आहेत. दोन दिवसांपूर्वीच अशाचप्रकारे अनुदानित कोळशाचे ४ ट्रक लाल पुलिया परिसरातील कोल डेपोवर खाली करण्यात आल्याची माहिती प्राप्त झाली आहे. या प्रकरणात पोलिसांना मोठे मासे गळाला लागण्याची शक्‍यता वर्तविण्यात येत असल्याने 'तो मी नव्हेच'ची भूमिका अनेक कोल डेपोधारक घेताना दिसत आहेत.