यवतमाळ : जिल्ह्यातील 980 ग्रामपंचायतींच्या सार्वत्रिक निवडणुकांचे बिगुल वाजल्याने संबंधित भागांत निवडणूक आयोगाने दिलेल्या आदेशाप्रमाणे आदर्श आचारसंहिता लागू करण्यात आलेली आहे. येत्या 15 जानेवारीला ग्रामपंचायतींसाठी मतदान केले जाणार आहे. त्यामुळे ग्रामीण भागातील सत्ता केंद्रांवर आपापले वर्चस्व प्रस्थापित करण्यासाठी जवळजवळ सर्वच राजकीय पक्षांनी मोर्चेबांधणीला आतापासूनच सुरुवात करण्यात आलेली असल्याचे चित्र सर्वत्र पाहावयास मिळत आहे. 

हेही वाचा - प्रेताच्या राखेतून भाकर शोधते माय, माणसाच्या अंतातून...

कोरोनामुळे गेल्या मार्च 2020मध्ये होणाऱ्या पहिल्या टप्प्यामधील जिल्ह्यातील ग्रामपंचायतींच्या सार्वत्रिक निवडणुका राज्य निवडणूक आयोगाने स्थगित केलेल्या होत्या. त्यानंतर आता पहिल्या व दुसऱ्या टप्प्यामधील ग्रामपंचायतींच्या निवडणुकीचा एकत्रित कार्यक्रम राज्य निवडणूक आयोगाने नुकताच जाहीर केलेला आहे. एकूण दोन टप्प्यांत जिल्ह्यातील 980 ग्रामपंचायतींच्या होणाऱ्या निवडणुका आता एकाच वेळी घेतल्या जाणार आहेत. त्यानुसार 2022मध्ये जिल्हा परिषद, पंचायत समित्यांच्यादेखील सार्वत्रिक निवडणुका होऊ घातलेल्या आहेत. त्याअनुषंगाने पुढील तयारी म्हणून ग्रामपंचायती आपल्या ताब्यात राहाव्यात, यासाठी सर्वच राजकीय पक्षांनी कंबर कसली असल्याचे चित्र सर्वत्र पाहावयास मिळत आहे. 

हेही वाचा - प्रेमाला हिंसेची किनार, फोटोंचा होतोय अस्त्रासारखा वापर; आपल्या मुलांची अशी घ्या काळजी

जिल्ह्यात काँग्रेस, शिवसेना, भाजपनंतर राष्ट्रवादी काँग्रेसची पकड आहे. राज्याच्या राजकारणापासून महाविकास आघाडीचा प्रयोग सुरू झाला आहे. तसाच प्रयोग हा यवतमाळ जिल्ह्यातील काही ग्रामपंचायतींमध्येदेखील होण्याची शक्‍यता व्यक्त केली जात आहे. त्यादृष्टीने स्थानिकांना तसे अधिकारदेखील देण्यात आलेले आहेत. गेल्या काळात राज्यात भारतीय जनता पक्षाची सत्ता असताना जिल्ह्यातील अनेक ग्रामपंचायतींवर 'कमळ' फुलले होते. ते बाजूला करण्यासाठी आता 'त्या' गावांमधील विरोधकांनी कंबर कसलेली दिसून येत आहे. ग्रामपंचायतींच्या सार्वत्रिक निवडणुकीसाठी मतदारयादीचा कार्यक्रमदेखील सुरू झालेला आहे. त्यामुळे येत्या 15 जानेवारीला एप्रिल ते डिसेंबर 2020 या कालावधीत मुदत संपणाऱ्या व नव्याने स्थापित सुमारे 980 ग्रामपंचायतींच्या सार्वत्रिक निवडणुकीसाठी संगणकीकृत पद्धतीने प्रत्यक्ष निवडणूक कार्यक्रम राबविण्यात येणार आहे.

हेही वाचा - आवाज कितीही बेसूर असला तरी गायला लावतात गाणी, पहाटेचा...

निवडणूक कार्यक्रम -

• तहसीलदारांनी निवडणुकीची नोटीस प्रसिद्ध करणे - 15 डिसेंबर
• नामनिर्देशनपत्रे सादर करण्याची मुदत - 23 ते 30 डिसेंबर
• नामनिर्देशनपत्र मागे घेणे - 4 जानेवारी 2021
• निवडणूक चिन्ह, अंतिम उमेदवार यादी - 4 जानेवारी 
• मतदान - 15 जानेवारी 2021
• मतमोजणी - 18 जानेवारी 2021