यवतमाळ : यवतमाळ विधानसभा मतदारसंघातील 13 उमेदवारांनी नामनिर्देशनपत्र दाखल केल्यापासून ते गेल्या रविवारपर्यंतचा (ता.13) खर्च निवडणूक विभागाकडे सादर केला आहे. त्यानुसार कॉंग्रेस उमेदवारांचा खर्च सर्वाधिक आहे. त्याखालोखाल शिवसेना बंडखोराचा समावेश असून, भाजप उमेदवार तिसऱ्या स्थानावर आहे.
निवडणूक विभागाचा उमेदवारांच्या खर्चावर वॉच आहे. खर्च सादर न करणाऱ्या उमेदवारांना "शोकॉज' दिल्या जात आहे. उमेदवारांना नामनिर्देशनपत्र दाखल केल्यापासून खर्च सादर करणे बंधनकारक आहे. यात रॅली, प्रचासभा, प्रचार कार्यालय, वाहन, नाश्‍ता, जेवण, चहा आदी सर्व बाबींचा समावेश करण्यात आला आहे. एका उमेदवाराला 28 लाखापर्यंत खर्च करण्याची मुभा आहे. विजयी रॅली निघेपर्यंतचा खर्च यात दाखवावा लागणार आहे. यामुळे खर्च आटोक्‍यात ठेवण्याचा प्रयत्न उमेदवारांकडून सुरू आहे. यवतमाळ विधानसभेत 13 उमेदवार निवडणुकीच्या आखाड्यात आहेत. त्यांनी सादर केलेल्या खर्चाची तपासणी निवडणूक विभागाकडून सुरू आहे.
13 ऑक्‍टोबरपर्यंत हिशेब पथकांनी तपासला आहे. त्यानुसार सर्वाधिक पाच लाख 65 हजार 770 रुपयांचा खर्च कॉंग्रेस उमेदवार बाळासाहेब मांगूळकर यांचा झाला आहे. वंचित बहुजन आघाडीचे उमेदवार योगेश पारवेकर यांनी दोन लाख 53 हजार 335 रुपये 11 ऑक्‍टोबरपर्यंत खर्च केले, शिवसेना बंडखोर अपक्ष उमेदवार संतोष ढवळे यांचा खर्च दोन लाख 47 हजार 776 रुपये खर्च दाखविला आहे. भाजप उमेदवार पालकमंत्री मदन येरावार सध्या चौथ्या क्रमांकावर असून त्यांनी दोन लाख 28 हजार 144 रुपये खर्च केले आहेत. यात आणखी वाढ होणार असून कोण उमेदवार किती खर्च दाखविणार याची उत्सुकता आहे.

दररोज होतेय तपासणी
निवडणूक रिंगणात असलेल्या उमेदवारांना दररोजच्या खर्चाचा हिशेब निवडणूक विभागाकडे सादर करावा लागत आहे. विधानसभा मतदारसंघात असलेल्या खर्च निरीक्षक पथकाकडून तपासणी होत आहे. यात तफावत आढळल्यास उमेदवारांना शोकॉज नोटीस दिली जाणार आहे.