सावनेर (जि. नागपूर) : नालीच्या सदोष बांधकामामुळे शिक्षक कॉलनीमध्ये राहणारे गजानन हुडकर यांच्या घराची संरक्षण भिंत कोसळली. त्याच्या घरालगतच नालीचे बांधकाम सुरू आहे. मात्र, नगरपालिकेचा बांधकाम कंत्राटदार निष्काळीपणे व हेकेखोर पद्धतीने काम करीत असल्यानेच भिंत पडून लाखोचे नुकसान झाल्याचा आरोप हुडकर यांनी केला आहे.झालेल्या नुकसानाची नगरपालिका व ठेकेदाराने नुकसानभरपाई द्यावी, अशी मागणी केली आहे. पांढुर्णा मार्गावरील वॉर्ड आठमध्ये नालीचे बांधकाम नागरिकांसाठी अडचणीचे ठरू लागले आहे. कंत्राटदाराच्या हलगर्जीपणामुळे येथील रहिवाशांना फटका बसू लागला आहे. मागील अनेक दिवसांपासून नालीचे बांधकाम सुरू आहे. यावर नगरपालिका प्रशासनाचे लक्ष नसल्याचा आरोप स्थानिकांनी केला आहे. नाली बांधकामात खोदकामानंतर निघालेली माती रस्त्यावर पसल्याने चिखल झाला आहे. त्यावरून चालणेदेखील कठीण झाले आहे. विद्यार्थी व महिलांना याचा सर्वाधिक त्रास सहण करावा लागत आहे. दुसरीकडे विधानसभेच्या निवडणुकीपूर्वी सर्वत्र शहरात विकासकामाच्या कार्यक्रमांना ऊत आला आहे. कंत्रटदाराच्या निष्काळजीपणा व दिरंगाईमुळेच गजानन हुडकर यांचे नुकसान झाले आहे. नगरपालिका प्रशासनाच्या बांधकाम विभागास सूचना देऊन पडलेली भिंत नगर प्रशासनाने अथवा कंत्रटदाराने बांधून द्यावी, अशी मागणी येथील नागरिकांनी एकमुखाने केली आहे.