चिखली (जि.बुलडाणा) : देशभरात पंतप्रधान नरेंद्र मोदी यांच्या आवाहनानंतर जनता कर्फ्यू सुरू असताना चिखली शहरातील काही युवकांना सुट्टीचा दिवस म्हणून आनंद लुटण्याचा मोह आवरता आला नाही. यातूनच शहरातील वायझडी धरणात पोहण्याकरिता गेलेल्या तीन युवकांपैकी एकाचा धरणाच्या पाण्यात बुडून मृत्यू झाल्याची घटना आज (ता.22) दुपारी 3.30 वाजेदरम्यान घडली.

पोलिस सूत्रांच्या प्राप्त प्राथमिक माहितीवरून, स्थानिक इंदिरा नगर गौरक्षणवाडी परिसरातील आसिफ खान सिकंदर खान व त्याचा लहान भाऊ अजीम खान सिकंदर खान व त्यांचे दाजी शेख आसिफ हे तिघे जनता कर्फ्युमुळे असल्याकारणाने चिखली शहरातील वायझडी धरणात पोहण्यासाठी गेले होते. त्यावेळी आसिफ खान सिकंदर खान या तरुणाचा धरणाच्या पाण्यात बुडून मृत्यू झाला. 

महत्त्वाची बातमी - 31 मार्च पर्यंत बँक विड्रॉल, लोन इन्स्टॉलमेंट बंद 

तो पर्यंत प्राणज्योत मावळली
या युवकाला कुटुंबातील लोकांनी धरणात शोधाशोध घेतली असता जवळपास 2 तासानंतर युवकाचा मृतदेह मिळून आल्यावर त्याला पाण्यातून बाहेर काढण्यात आले, तो पर्यंत त्याची प्राणज्योत मावळली होती. मृतक युवक हा मंदबुद्धी असल्याची चर्चा नागरिक करीत होते. सदर मृतकाचा मृतदेह शवविच्छेदनाकरिता चिखली येथील शासकीय ग्रामीण रुग्णालयात आणण्यात आला होता. या घटनेचा पुढील तपास पोलिस स्टेशन चिखलीचे वरिष्ठ पोलिस निरीक्षक गुलाबराव वाघ यांच्या मार्गदर्शनात पीएसआय पांडुरंग शिंदे, सदानंद चाफले व गोरखनाथ राठोड करीत आहेत.