मोहाडी (जि. भंडारा) : विविध कामासाठी लागणाऱ्या प्रमाणपत्रांसाठी दोन हजारांवर प्रकरणे तहसील कार्यालयात पडून आहेत. गेल्या दोन महिन्यांपासून तहसीलदारांच्या डिजिटल स्वाक्षरीच्या प्रतीक्षेत प्रमाणपत्र अडले असून नागरिकांसह व शालेय विद्यार्थ्याना कमालीचा त्रास सहन करावा लागत आहे.
मोहाडीचे तहसीलदार धनंजय देशमुख यांचे स्थानांतरण झाल्याने त्याच्या जागी देवदास बोंबुर्डे तहसीलदार म्हणून मे महिन्याच्या शेवटी येथे रुजू झाले. तहसील कार्यालयात सर्वच कामे ऑनलाइन होत असल्याने डिजिटल स्वाक्षरीनेच प्रमाणपत्र दिले जाते. नव्याने मोहाडीत नव्याने रुजू झालेल्या तहसीलदार देवदास बोंबुर्डे यांच्या डिजिटल स्वाक्षरीची डीएससी बनवण्यासाठी महासेवा केंद्र मुंबई येथे पाठविण्यात आले.
मात्र, मुंबईत कोरोना महामारीने काही कार्यालये नियमित चालू नाहीत. केवळ दहा टक्के कर्मचारी कामावर असल्याने तहसीलदारांची स्वाक्षरी डिजिटल स्वरूपात प्राप्त झाली नाही. एप्रिल महिन्यापासून मोहाडी तहसील कार्यालयात विविध प्रमाणपत्र करिता दोन हजारांवर प्रमाणत्र डिजिटल स्वाक्षरीच्या प्रतीक्षेत पडून आहेत.या प्रमाणपत्रांवर तहसीलदारांची स्वाक्षरी महत्वाची आहे.
नुकतेच दहावी व बारावीचे निकाल घोषित झाल्याने पुढील शिक्षणासाठी प्रवेशअर्जासोबत जोडण्यात येणारे अधिवास प्रमाणपत्र, उन्नत वर्गात मोडत नसल्याचे प्रमाणपत्र, उत्पन्नाचे प्रमाणपत्र, वृद्धापकाळ योजनेचा लाभ घेण्यासाठी लागणाऱ्या अर्जासोबत तहसीलदारांचे उत्पन्नाचे प्रमाणपत्र, 30 टक्के महिला आरक्षण प्रमाणपत्र, शेतकरी प्रमाणपत्र व वार्षिक उत्पन्नाचे प्रमाणपत्र तहसीलदारांच्या स्वाक्षरीनेच ग्राह्य धरल्या जाते. तहसीलदाराची डिजिटल स्वाक्षरी महासेवा पोर्टलवर प्रमाणित न झाल्याने संबंधित दोन हजारांवर प्रकरणे तहसील कार्यालयात प्रलंबित आहेत.
मोहाडी तालुक्याचे वैनगंगा नदी पात्रामुळे दोन भागात विभाजन झाले आहे. पलीकडच्या भागातील नागरिक तुमसर मार्गे मोहाडीला येतात. दोन महिन्यांपासून प्रकरणे प्रलंबित असल्याने त्यांना प्रमाणपत्रावर स्वाक्षरी झाली काय हे माहित करण्यासाठी अनेकदा येऊन परत जावे लागते. यात पैसा व वेळेचा अपव्यय होत असल्याने नागरिक त्रासले आहेत. काही विद्यार्थ्याना समोरच्या शिक्षणापासून वंचित होण्याची स्थिती येऊ शकते.
मोहाडी तहसील कार्यालयात दोन नायब तहसीलदार कार्यरत असले तरी, नायब तहसीलदार सोनकुसरे यांची डिजिटल स्वाक्षरी आहे. त्यांच्यामार्फत उत्पन्नाचे प्रमाणपत्र देता येऊ शकते. मात्र, त्यांच्या कडून नागरिकांची अडवणूक केली जात आहे. दुसरे नायब तहसीलदार नव्याने बदलून आले असून त्याची डिजिटल स्वाक्षरी प्रमाणित केली नाही. त्याच्याकडे अन्न पुरवठा विभागाचे काम दिले आहे.
डिजिटल स्वाक्षरीसाठी महासेवा पोर्टलच्या कार्यालयात डीएससी बनविण्याकरिता दिलेली आहे. मात्र, ती अद्याप न मिळाल्याने स्वाक्षरीसाठी बरीच प्रकरणे प्रलंबित आहेत. एक दोन दिवसांत डिजिटल स्वाक्षरी झाल्यावर प्रकरणे निकाली काढण्यात येतील.
-देवदास बोंबुर्डे
तहसीलदार, मोहाडी.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.