नागपूर  : राज्य सरकारने शेतकऱ्यांना मदतीसाठी पहिल्या हप्त्यापोटी २ हजार २९७ कोटी ६ लाख ३७ वितरित केले. येत्या दोन-तीन दिवसांत शेतकऱ्यांच्या खात्यात रक्कम जमा केली जाईल, असे मदत व पुनर्वसन मंत्री विजय वडेट्टीवार यांनी नागपूरमध्ये माध्यमांशी बोलताना सांगितले. राज्य सरकारने निवडणूक आयोगाला मदत वाटपास परवानगी देण्याकरता पत्र दिले होते. आयोगाने आज ती मान्य केली.

राज्यात जून ते ऑक्टोबर महिन्यादरम्यान अतिवृष्टी आणि परतीच्या पावसाने शेतीचे तसेच ग्रामीण भागातील घरे, रस्ते, पूल यांचे मोठे नुकसान झाले. मुख्यमंत्री उद्धव ठाकरे मदतीसाठी १० हजार कोटींचे पॅकेज जाहीर केले होते. तसेच शेतकऱ्यांना दिवाळीपूर्वी मदत करण्याचे आश्वासन दिले होते. 

क्लिक करा - सरकार परत घेणार शेतकऱ्यांचा ‘सन्मान’; तुमचा तर यात समावेश नाही ना
 

दिवाळीआधी पहिला हप्ता देण्यात येणार आहे. नुकसानीचे उर्वरित रक्कम नंतर दिली जाणार आहे. संपूर्ण नुकसानभरपाई दिवाळी आधी देण्याची तयारी होती, मात्र अचानक निवडणूक जाहीर झाली. त्यामुळे काही अडचण निर्माण झाली. जिल्हाधिकाऱ्यांमार्फत निधी शेतकऱ्यांच्या खात्यात जमा करण्यात येणार असल्याचे त्यांनी सांगितले. 

विरोधकांकडून मदत वाटपाच्या आकडेवारीबाबत संभ्रम निर्माण करण्याचा प्रयत्न होत आहे. विरोधी पक्षातील नेते विदर्भाला केवळ ८ कोटी मिळणार असल्याचा चुकीचा प्रचार करीत आहेत. विदर्भाला ५६६ कोटींची मदत मिळणार आहे. केंद्र सरकार अतिवृष्टीसाठी राज्य सरकारला मदत करीत नाहीत. त्यासाठी विरोधी पक्षाचे नेते साधे पत्र देखील केंद्राला लिहत नाही. त्यांना शेतकऱ्यांची चिंता नाही, असेही ते म्हणाले.

विभागनिहाय मदत

• विदर्भ : ५६६ कोटी
• मराठवाडा : २ हजार ६३९ कोटी
• उत्तर महाराष्ट्र : ४५० कोटी
• पश्चिम महाराष्ट्र : ७२१ कोटी
• कोकण : १०४ कोटी 

संपादन  : अतुल मांगे