ब्रह्मपुरी (चंद्रपूर) : दिवसभर काबाडकष्ट केल्यानंतर मनुष्याला रात्रीच्या निवांत झोपेची नितांत गरज असते. रात्रीची पुरेशी झोप दुसऱ्या दिवशी ताजेतवाने करते. मात्र ब्रह्मपुरी तालुक्‍यातील बळीराजाला डोळ्याला रात्रीची झोप नाहीच. शेतातील पिकांना पाणी देण्यासाठी विजेच्या प्रतीक्षेत रात्रभर त्याला जागावे लागत आहे. ते जंगली श्‍वापदांच्या सावटात. कृषीपंपाचा वीज पुरवठा दिवसा बंद असतो आणि रात्री सुरू असतो. त्यामुळे दिवस आणि रात्र बळीराजाच्या डोळ्याला डोळा लागत नाही.

हेही वाचा  - उपराजधानीत महावितरणची धडक कारवाई: तब्बल १ हजार १६१ थकबाकीदारांना 'शॉक'

भारनियमनामुळे शेतीसाठी  आळीपाळीने आठवड्याभरात दिवस -रात्र असा वीज पुरवठा केला जातो. त्यामुळे शेतात पाणी देण्यासाठी बहुतांश शेतकऱ्यांना कुटुंबासह रात्र जागून काढावी लागत आहे. 

या परिसरातील बहुतांश शेतजमीन जंगलव्याप्त आहे.  त्यामुळे रात्री वन्यजीवांच्या दहशतीत शेतकऱ्यांना काम करावे लागते. शासनाने आता तरी बळीराजासाठी असलेली भारनियमाची रात्रीची चेष्टा थांबवावी. तांत्रिक अडचणी दूर करून अधिक दाबाने वीज पुरवठा सुरू करावा, अशी मागणी ब्रह्मपुरी तालुक्‍यातील बळीराजा करीत आहे. 

हेही वाचा - सर्व रात्रीला मिळून जेवले, 'ते' खोलीत गेले...

हिंस्र पशूंची भीती

ब्रह्मपुरी तालुका चोहोबाजूंनी जंगलाने व्यापलेला आहे. त्यामुळे या भागात वाघ, बिबट,रानडुकर, अशा हिंस्र पशूंचा वावर नित्याचीच बाब झाली आहे.  अशावेळी रात्री जीव मुठीत घेऊनच पिकांना पाणी द्यावे लागते. त्यामुळे शेतकऱ्यांची गैरसोय टाळण्यासाठी  शेतीला दिवसा वीजपुरवठा करावा, अशी मागणी तालुक्‍यातील बळीराजा करीत आहेत.

संपादन - अथर्व महांकाळ