अमरावती : सोयाबीन पीक काढणीच्या ऐन हंगामात पावसाने जोरदार हजेरी लावल्याने शेतकऱ्यांच्या काळजाचा ठोका चुकू लागला आहे. सप्टेंबर महिन्यातील सततच्या पावसाने पिकांच्या उत्पादनाची सरासरी घसरण्यासोबतच प्रतवारीवरही परिणाम होण्याची शक्यता आहे. दरम्यान हवामान खात्याने पाऊस लवकर थांबणार नसल्याचा अंदाज वर्तविला आहे.

अमरावती विभागात सप्टेंबर महिन्यात आतापर्यंत एकूण २४१ मिमी पाऊस बरसला आहे. अपेक्षित पावसाच्या तुलनेत तो सरासरी २०४.६ टक्के झाला आहे. गतवर्षी आतापर्यंत विभागात ७७१.९ मिमी पाऊस झाला होता. यंदा याच कालावधीत १०६ मिमी पाऊस अधिक झाला आहे. मूग, उडीद व सोयाबीन काढणीचा हा हंगाम आहे. बऱ्याच ठिकाणी सोयाबीन काढणी सुरू झाली असून नवीन सोयाबीन बाजारात आला आहे. अशावेळी पावसाने हजेरी लावल्याने शेतकऱ्यांच्या हृदयाची धडधड वाढली आहे. उत्पादनाच्या सरासरीसोबतच प्रतवारी घसरण्याची शक्यता निर्माण झाली आहे.

गतवर्षी सोयाबीनची उत्पादकता ८ क्विंटलपर्यंत होती. यंदा ती १३ क्विंटलपर्यंत जाईल असा अंदाज कृषी विभागाने व्यक्त केला होता. मात्र, हा अंदाज आता खोटा ठरू लागला आहे. जून ते सप्टेंबर या कालावधीत सर्वाधिक पावसाची नोंद यवतमाळ जिल्ह्यात १०४२ मिमी तर बुलडाणा ७४२ मिमी, अकोला ७५७ मिमी, वाशीम ९७८ मिमी, अमरावती ८३५ मिमी पाऊस झाला आहे.

यंदाही दुष्काळच

यंदा सोयाबीनचे उत्पादन चांगले होऊन चढे भाव मिळेल अशी आशा होती. मात्र, सप्टेंबर महिन्यातील पावसाने नको त्यावेळी येऊन नुकसान केले आहे. नवीन सोयाबीन काढणी सुरू असून, बाजारातील स्थिती बघता भाव मिळणार नाही, अशी व्यथा किसनराव कुऱ्हाडे या शेतकऱ्याने व्यक्त केली.

उत्पादकता घसरण्याची शक्यता

पावसाचे प्रमाण बघता गतवर्षी प्रमाणे यंदाही सोयाबीनची उत्पादकता घसरण्याची शक्यता आहे. सद्या काही ठिकाणी काढणी सुरू आहे. मात्र, उत्पादनाची सरासरी घसरलेली असल्याचे दिसून येऊ लागले आहे, असे प्रभारी जिल्हा अधीक्षक कृषी अधिकारी अनिल खर्चान यांनी सांगितले.