अमरावती : दोन भावांचे भांडण सोडविणे पित्याच्या जीवावर बेतल्याची घटना भातकुली (Bhatkuli amravati) तालुक्यातील आबीदपूर येथे घडली. मोठ्या मुलाने नाकावर मारल्यामुळे त्यांचा मृत्यू झाला. महादेव तायडे (वय ७०) असे मृत पित्याचे नाव असून पोलिसांनी मुलाला अटक केली आहे.

महादेव यांचा मुलगा ज्ञानेश्वर तायडे रात्री मद्यप्राशन करून आला. त्यानंतर लहान भाऊ दीपक तायडे याच्यासोबत भांडण झाले. मद्यप्राशन करून आलेल्या ज्ञानेश्वरला त्याने घराबाहेर जाण्यास सांगितले. यावरून त्यांच्यातील वाद विकोपास गेला. दोघांमध्ये जोरदार हाणामारी सुरू होती. दरम्यान वडील महादेव तायडे यांनी मध्यस्थी करून भांडण सोडविण्याचा प्रयत्न केला असता ज्ञानेश्वरने त्यांच्या नाकावर जोरदार ठोसा मारल्याने ते जखमी होऊन खाली पडले. त्यांना तत्काळ जिल्हा सामान्य रुग्णालयात उपचारार्थ हलविण्यात आले. मात्र, अतिरक्तस्त्राव झाल्याने त्यांचा उपचारादरम्यान मृत्यू झाला.

वलगाव पोलिसांनी याप्रकरणी लहान मुलगा दीपक तायडे याच्या फिर्यादीवरून खुनाच्या आरोपाखाली गुन्हे दाखल केला. तसेच ज्ञानेश्वर तायडे यास अटक केली आहे. याप्रकरणी पोलिस निरीक्षक गोरखनाथ जाधव अधिक तपास करीत आहेत.