यवतमाळ : घाटंजी येथील वाघाडी नदीत बुडून बाप-लेकाचा दुर्दैवी मृत्यू झाला. ही घटना रविवारी (ता.21) दुपारी दोन वाजतादरम्यान घडली. 
"फादर्स डे'च्या दिवशी घडलेल्या घटनेने घाटंजी तालुक्‍यात हळहळ व्यक्त होत आहे. संजय शिवप्रसाद अग्रहारी (वय 42), मुलगा आदित्य संजय अग्रहारी (वय 13, रा. शिवाजी चौक) अशी मृतांची नावे आहेत. 

याबाबत मिळालेल्या माहितीनुसार, आज संजय अग्रहारी यांचे कुटुंब व सुभाष सायरे यांचे कुटुंब सूर्यग्रहण असल्याने विधी करण्याकरिता वाघाडी नदीच्या पात्राजवळ गेले होते. दोन्ही कुटुंबाची पूजा झाल्यावर आंघोळ करताना सुभाष सायरे, संजय अग्रहारी, त्यांचा मुलगा आदित्य व एक लहान मुलगा असे एकूण चार जण पाण्यात बुडत असतानाचे पाहून सोबत असणाऱ्या महिलांनी व पुजाऱ्याने आरडाओरडा केली. तेथे उपस्थित भोयर यांना आरडाओरड ऐकू आल्यानंतर त्यांनी नदीपात्रात उडी घेऊन सर्वांचा वाचविण्याचा प्रयत्न केला. परंतु त्यांना सुभाष सायरे व एका लहान मुलाला वाचविण्यात यश झाले. संजय व आदित्य यांचा बुडून मृत्यू झाला. 

हेही वाचा - काकूच्या प्रेमात आकंठ बुडाला पुतण्या, काका ठरत होता अडसर... मग
 

नागरिकांच्या मदतीने दोघांचे मृतदेह बाहेर काढण्यात आले. घटनेची माहिती घाटंजी पोलिस स्टेशनला मिळाल्यावर पोलिस ठाण्याच्या कर्मचाऱ्यांनी घटनास्थळी पोहचल्यानंतर दोन्ही मृतदेह ग्रामीण रुग्णालय येथे पाठविण्यात आले. दोघांनाही डॉक्‍टरांनी मृत घोषित केले व सुभाष सायरे यांच्यावर उपचार सुरू आहे.

दोन्ही मृतदेहाचे शवविच्छेदन करणार असल्याचे सांगण्यात आले. यावेळी पोलिस निरीक्षक दिनेशचंद्र शुक्‍ला कर्मचाऱ्यांसोबत हजर होते. ही घटना वाऱ्यासारखी शहरात पसरली. त्यामुळे नागरिकांनी खूप गर्दी केली होती. एकाच वेळेस वडील व मुलाचा असा अचानक मृत्यू झाल्यामुळे सर्वत्र हळहळ व्यक्त केली जात आहे.