अर्जुनी मोरगाव (गोंदिया ) : आदिवासीबहुल, नक्षलग्रस्त अशी शासन दरबारी नोंद असलेल्या अर्जुनी मोरगाव तालुक्‍यात महिन्याभरापासून चोरट्यांनी दहशत माजविली आहे. दररोज कुठे ना कुठे चोरीच्या घटना घडत असल्याने नागरिकांमध्ये भीतीचे वातावरण निर्माण झाले आहे. पोलिसदेखील अजूनही चोरट्यांच्या मुसक्‍या आवळण्यात अपयशी ठरले आहेत. तालुक्‍यात नवेगावबांध, केशोरी व अर्जुनी मोरगाव अशी एकूण तीन पोलिस ठाणी आहेत. सद्यःस्थितीत तालुक्‍यातील सर्वत्रच चोऱ्यांचे प्रमाण अधिक वाढले आहे. 

कॉंग्रेसने तिकीट नाकारल्याने अनेकांची बंडखोरी

प्राथमिक शाळेत चोरी

काही दिवसांपूर्वी तालुक्‍यातील येगावपाठोपाठ बाराभाटी येथील ग्रामपंचायत कार्यालय फोडून चोरट्यांनी संगणक व साहित्य चोरून नेले. हा तपास सुरू असतानाच काही दिवसांनी इटखेडा, जाणवा, कोरंभी या तीनही ठिकाणच्या ग्रामपंचायतींच्या कार्यालयाचे कुलूप तोडून संगणकीय साहित्य तसेच कोरंबी येथील जिल्हा परिषद प्राथमिक शाळेतसुद्धा चोरी करून संगणक साहित्य लांबविले. या घटनेनंतर 

मंदिरात दर्शन घेऊन वृद्ध दाम्पत्य गेले शेतावर... नंतर झाले अदृश्‍य

ग्रामपंचायत कार्यालय फोडून दस्तऐवजांची नासधूस

लगेच चार दिवसांनी वडेगाव बंध्या या ठिकाणचे ग्रामपंचायत कार्यालय फोडून दस्तऐवजांची नासधूस केली. एकंदरीत तालुक्‍यात सर्वत्र चोरांचा हाहाकार माजलेला आहे. चोरांनी ग्रामपंचायत कार्यालयांकडे मोर्चा वळवून संगणक साहित्य चोरून नेण्याचा सपाटा लावल्याचे दिसते. यातही भर म्हणजे महागाव येथील शंकर गहाणे यांच्या घरी रात्रीच्या वेळी दोन लाखांची चोरी झाली. लागोपाठ होणाऱ्या चोऱ्यांमुळे गावखेड्यातील नागरिक भयभीत झाले आहेत. पोलिस विभागाने या चोरांचा छडा लावण्यासाठी सीसीटीव्ही फुटेजसुद्धा तपासले; मात्र विशेष असे काहीही पोलिसांच्या हाती लागले नाही. दरम्यान, भयमुक्त जीवन जगण्यासाठी पोलिस प्रशासनाने या चोरांचा ताबडतोब बंदोबस्त करावा, अशी मागणी तालुकावासींनी केली आहे. 

सर्वत्र होत असलेल्या चोरीच्या घटनांवर अंकुश लावण्यासाठी आमचे शर्थीचे प्रयत्न सुरू आहेत. सीसीटीव्ही फुटेज तपासले जात आहे. जिल्ह्यातील पोलिस विभागाकडून माहिती घेणे सुरू आहे. लवकरच चोरट्यांना गजाआड करू. 
-महादेव तोंडले, ठाणेदार, अर्जुनी मोरगाव.