अमरावती : शहरालगतच्या वलगाव हद्दीतील आमला गावातील नाल्याला रविवारी रात्री पूर आला. या पुरात चौघे वाहून गेले. त्यात एका व्यक्तीचा मृत्यू झाला. दुसऱ्याने झाडाचे मूळ पकडल्याने बचावला तर दोघे सोमवारी (ता. तीन) दुपारपर्यंत बेपत्ता होते. जिल्हा शोध व बचाव पथकाकडून युद्धपातळीवर मदतकार्य सुरू होते. 

अंकुश सुरेश सगणे (वय २८, रा. आमला) असे मृत युवकाचे नाव असल्याचे वलगाव पोलिसांनी सांगितले. अंकुशसह विनायक कोरे, सतीश अण्णाजी भुजाडे, पद्माकर गोवर्धन वानखडे (सर्व रा. आमला) हे चौघेही वलगावात शेतमजुरीचे काम करायचे. रात्री उशिरापर्यंत काम केल्यानंतर चौघेही दुचाकीने वलगाव ते आमला मार्गावरील पुलाजवळ आले. परंतु, संततधार पाऊस सुरू असल्यामुळे पुलावरून पाणी वाहू लागले.

हेही वाचा - हे काय, तुकाराम मुंढे यांच्या घरावर धडकले नागरिक, काय असेल कारण...

बऱ्याच वेळेपर्यंत त्यांनी पुराचे पाणी ओसरण्याची वाट बघितली. मध्यरात्री बारा वाजले तरी पुलावरील पाण्याचा ओघ कमी होत नव्हता. दुचाकी घेऊन जाणेही धोक्याचे वाटत होते. त्यामुळे त्यांनी दोन्ही दुचाकी पुलाजवळ सुरक्षित ठिकाणी लॉक करून उभ्या ठेवल्या. 

घरी जाण्याची ओढ असल्यामुळे चौघांनी एकमेकांचे हात घट्ट पकडले. कमरेपेक्षा जास्त पाणी असतानाही पुलावरून जाण्याचा धोका त्यांनी पत्करला. पाण्याचा जोर वाढल्यामुळे मधोमध असताना चौघांच्याही हाताची साखळी तुटल्याने ते वाहत गेले. त्यापैकी विनायक कोरे यांच्या हाती नाल्याच्या मधात असलेल्या झाडाचे मूळ सापडले. मूळ घट्ट पकडल्यामुळे कोरे बचावले. उर्वरित तिघे वाहत गेले.

अधिक माहितीसाठी - 'घरी रहा, सुरक्षित रहा' या मानसिकतेतून बाहेर पडा..राज्यात मोठया पदावर असणाऱ्या व्यक्तीचे विधान.. वाचा सविस्तर...

सोमवारी (ता. तीन) पहाटे सहाच्या सुमारास ग्रामस्थांना नाल्याच्या काठावर अंकुश सगणे यांचा मृतदेह आढळला. वलगाव पोलिसांनी मृतदेह ताब्यात घेऊन उत्तरीय तपासणीसाठी जिल्हा सामान्य रुग्णालयाच्या शवागारात पाठविला. 

सकाळपासून मृतदेह शोधणे सुरू

मध्यरात्रीच वलगाव पोलिस घटनास्थळी पोहोचले. जिल्हाधिकारी कार्यालयाच्या आपत्ती व्यवस्थापनाच्या पथकाला घटनेची माहिती देण्यात आली. रात्रीला शोधकार्य कठीण होते. त्यामुळे सोमवारी सकाळपासून शोधमोहीम सुरू झाली.

क्लिक करा - युवती ब्युटीपार्लरमध्ये चेहऱ्याच्या मसाजसाठी जायची; महिला नेहमी कशाचे तरी पाणी पिण्यासाठी देत पैशांसाठी करायची ब्लॅकमेल, वाचा...

नातेवाइकांचा घटनास्थळी आक्रोश

आमला येथील तिघे पुरात वाहून गेल्याचे कळताच काहींनी रात्रीच घटनास्थळी धाव घेतली. पहाटेपासून अधिकच गर्दी वाढली. एकाचा मृतदेह सापडल्यानंतर बेपत्ता असलेल्यांच्या नातेवाइकांचा आक्रोश सुरू होता. मजुरीसाठी गेले अन् परत का आले नाही, असे वाक्य अनेकांच्या तोंडून ऐकायला मिळाले. 

संपादन - नीलेश डाखोरे