अमरावती : विवाहितेला तिच्या ओळखीतील मित्राने शरीरसुखाची मागणी केली. रस्त्यात गाठून मारहाण केली. तिने मदतीसाठी आरडाओरड केली असता, पळून जाताना तो रस्त्यात पडला, त्यामुळे काही लोकांनी त्याला पकडून फ्रेजरपुरा पोलिसांच्या स्वाधीन केले.

फ्रेजरपुरा हद्दीतील एका मुलाची आई असलेल्या महिलेचे पतीसोबत पटत नव्हते. त्यांचे प्रकरण न्यायप्रविष्ट होते. याच कालावधीत नरेंद्र रामदास आठवले (वय 31 रा. कवठाळ) याने पीडितेसोबत लग्न करण्याची तयारी दाखवली. त्यानंतर दोघेही नोव्हेंबर 2019 पासून भाड्याची खोली घेऊन पती, पत्नीप्रमाणे राहू लागले.

एका महिन्यांनतर त्या दोघांनी फ्रेजरपुरा ठाण्याच्या हद्दीत खोली भाड्याने घेतली. परंतु त्यानंतर नरेंद्र पीडितेला व तिच्या मुलाला मानसिक त्रास देत होता, असा पीडित महिलेचा आरोप आहे. त्यानंतर सोबत राहायचे नाही, म्हणून पीडितेने नरेंद्र सोबतचे संबंध तोडले. परंतु त्यानंतरही तो वारंवार फोन करून पीडितेचा पाठलाग करून शरीरसुखाची मागणी करीत होता.

- मोठी बातमी : गृहमंत्र्यांच्या जिल्ह्यात घडली ही गंभीर घटना, तीन नराधमांनी विद्यार्थिनीला नेले झुडपात

रस्त्यावर मारहाण
बाजारातसुद्धा त्याने अश्‍लील भाषेत पीडितेशी संवाद साधला. मंगळवारी (ता. 21) पीडितेने त्याप्रकरणात फ्रेजरपुरा ठाण्यात तक्रार नोंदवली. तक्रार नोंदवून घराकडे परत जात असताना नरेंद्रने तिला पुन्हा रस्त्यात अडवून, तिच्याशी बळजबरीचा प्रयत्न केला असता, पीडितेने आरडाओरड केल्याने नरेंद्रने तेथून पळ काढला. काही लोकांनी पीडितेच्या मदतीसाठी धाव घेतली असता, पळताना नरेंद्र पडला, अन्‌ लोकांनी त्याला पकडले. फ्रेजरपुरा पोलिसांना माहिती दिली. पोलिसांनी त्याच्याविरुद्ध विनयभंग, मारहाण, धमकी दिल्याप्रकरणी गुन्हा दाखल करून अटक केली.