गडचिरोली : स्कॉय मार्शल आर्ट या क्रीडा प्रकारात वयाच्या पाचव्या वर्षापासून सुवर्णपदके जिंकत आलेली आणि गडचिरोलीची सुवर्णकन्या म्हणून ख्यातीप्राप्त एंजल देवकुले हिची चॅम्पियन बुक ऑफ वर्ल्ड रेकॉर्डमध्ये नुकतीच नोंद झाली आहे. 

हेही वाचा - रेडिओच्या शोधाचा वाद अन् जगातील पहिले रेडिओ केंद्र माहितीये का?

एंजल देवकुले सध्या येथील प्लॅटिनम ज्युबिली स्कूल तथा कनिष्ठ महाविद्यालयात सातव्या वर्गात शिकत आहे. ती स्कॉय मार्शल आर्ट या खेळामध्ये जागतिक स्तरावरची सर्वात कमी वयाची सुवर्णपदक विजेती ठरली आहे. याची नोंद घेत चॅम्पियन बुक ऑफ वर्ल्ड रेकॉर्डने आपल्या पुस्तकात एंजलच्या नावाची नोंद केली आहे. विशेष म्हणजे यापूर्वी २०१७ मध्ये थायलंड (चिंगमई) येथे आयोजित पाचव्या आशियायी स्पर्धेत तिने दोन सुवर्णपदके आणि २०१८ मध्ये साउथ कोरिया येथे आयोजित तिसऱ्या विश्‍वचषक स्कॉय मार्शल आर्ट स्पर्धेत दोन सुवर्णपदके पटकावली. २०१९ मध्ये याच खेळाकरिता राष्ट्रपती भवनात तिला सन्मानित करण्यात आले. तसेच २२ जानेवारी २०२० रोजी तिला राष्ट्रपती भवनात प्रमुख पाहुणी म्हणून आमंत्रित करण्यात आले होते. ती आशियातील ५ प्रभावशाली खेळाडूंमध्ये समाविष्ट झाली आहे. राज्याचे नगरविकास, पर्यावरण, पर्यटन व संसदीय कार्यमंत्री तथा ठाणे व गडचिरोली जिल्ह्याचे पालकमंत्री एकनाथ शिंदे, माजी मुख्यमंत्री देवेंद्र फडणवीस, हरियानाचे राज्यपाल कप्तानसिंग सोलंकी, केंद्रीय मंत्री नितीन गडकरी, माजी अर्थमंत्री सुधीर मुनगंटीवार, पद्मश्री डॉ. प्रकाश आमटे आदींनी एंजलचा गौरव केला आहे. 

हेही वाचा - कोरोनाच्या नवीन 'स्ट्रेन'ची भीती; २८ फेब्रुवारीपर्यंत शाळा, महाविद्यालये बंद

एंजलने विविध स्पर्धांत आतापर्यंत ६० सुवर्णपदके व अनेक पुरस्कार पटकावले आहेत. तिला यशाच्या शिखरावर पोहोचविण्यासाठी तिचे मार्गदर्शक संदीप पेदापल्ली यांनी अथक परिश्रम घेतले. संस्थेचे महासचिव अजित नाथानी, प्राचार्य रहिम अमलानी यांनी एंजलचे अभिनंदन करून पुढील वाटचालीसाठी शुभेच्छा दिल्या. एंजलने आपल्या यशाचे श्रेय वडील विजय देवकुले, आई स्वाती देवकुले, अजीज नाथानी, प्राचार्य रहिम अमलानी तसेच मार्गदर्शक संदीप पेदापल्ली यांना दिले आहे.