गोंदिया : घातपात घडवून आणण्याच्या उद्देशाने नक्षलवाद्यांनी गडमाता पहाडी-बेवारटोला धरणाजवळील जंगलात पेरून ठेवलेले विस्फोटके गोंदिया पोलिसांनी जप्त केलीत. ही कारवाई रविवारी ( ता. ७) केली.

सालेकसा तालुक्यातील सशस्त्र दूरक्षेत्र दरेकसा जंगल परिसरात घातपात घडवून आणण्यासाठी नक्षलवाद्यांनी स्फोटके पेरून ठेवले आहेत. अशी गुप्त माहिती नक्षल सेल गोंदिया यांना मिळाली.

या माहितीवरून जिल्हा पोलिस अधीक्षक विश्व पानसरे, उपविभागीय पोलिस अधिकारी नालकुल यांच्या मार्गदर्शनाखाली नक्षल सेल गोंदिया, सी-६० गोंदिया, सी-६० सालेकसा येथील कमांडो पथक व बिडीडीएस पथक गोंदियाने गडमाता पहाडी- बेवारटोला धरणाच्या जंगल परिसरात सर्च ऑपरेशन राबविले. यावेळी पहाडी भागात संशयित वस्तू आढळून आल्याने श्वान पथक व बिडीडीएस पथकाने पहाणी केली. या पहाणीत जिलेटीन कांड्या, चाकू, गावठी बंदुकीच्या राउंड, मेडिसिन ठेवलेला प्लास्टिक डबा, पिस्टल अन्य साहित्य आढळून आले. पोलिसांनी हे साहित्य बाहेर काढून जप्त केले आहेत. पुढील तपास सुरू आहे.