अमरावती : शहरात महाविद्यालयीन युवतींच्या छेडखानीच्या घटना वाढत आहेत. लॉकडाउनमुळे युवती घराबाहेर पडत नसल्यामुळे घरात घुसून छेडखानी करण्यापर्यंत काही मजनूंची मजल गेली आहे. मागील काही दिवसांपूर्वी युवकाने युवतीचा कॉलेज समोरच चाकू मारून खून केला होता. यामुळे मुलींमध्ये भीतीचे वातावरण आहे. असे असताना एका युवकाने चक्‍क मुलीच्या घरात शिरून भावाला "ही माझी आहे, आमच्यामध्ये पडलास तर ठार मारेल' अशी धमकी दिली. या घटनेमुळे मजनूंची हिंमत चांगलीच वाढली असल्याचे दिसून येते. 

प्राप्त माहितीनुसार, अमरावती शहरात फ्रेजरपुरा ठाण्याच्या हद्दीत दस्तूरनगर भागात 19 वर्षीय युवती राहते. ती महाविद्यालयीन विद्यार्थिनी आहे. विशाल बाबर (रा. कमल कॉलनी) हा तिच्यावर एकतर्फी प्रेम करतो. विशाल हा काही दिवसांपासून युवतीच्या महाविद्यालयासमोर जाऊन पाठलाग करीत होता. मात्र, युवतीने याकडे दुर्लक्ष केले. तरीही विशाल पाठलाग करीत असल्याने युवतीने बजावले होते. मात्र, त्याने "तू मला आवडले, माझ्याशी प्रेमसंबंध ठेवण्याची' मागणी केली होती. यावेळी युवतीने विशालला स्पष्ट शब्दात नकार दिला होता. 

अधिक वाचा - मुंढे साहेबऽऽ, सातशे जणांना क्वारंटाइन करण्याची वेळ कोणामुळे आली? आता माफी मागा...

मात्र, विशालच्या वर्तनात कोणताही फरक पडत नसल्याचे बघून युवतीने आपल्या कुटुंबीयांना याची माहिती दिली. तरीही विशालकडून पाठलाग करणे काही केल्या कमी होत नव्हते. युवती सतत विशालला टाळत होती. ही बाब मात्र विशालला खटकत होती. युवती टाळत असल्याचा प्रकार असाह्य झाल्यामुळे विशालने कशाचाही विचार न करता थेट युवतीच्या घरात प्रवेश केला. तिच्यापुढे प्रेमाचा प्रस्ताव ठेवून मन वळविण्याचा प्रयत्न केला. मात्र, युवतीने नकार दिला. यामुळे चिडलेल्या विशालने युवतीसोबत बळजबरी करण्याचा प्रयत्न केला. 

तक्रारीवरून गुन्हा दाखल

विशाल चक्‍क युवतीच्या घरात घुसून प्रेमाची मागणी घालू लागला. मात्र, युवतीने त्याला नकार दिला. यामुळे युवतीच्या भावाने त्याला निघून जाण्यास सांगितले. मात्र, विशालने उलट तिच्या भावालाच धमकी दिली. "ही माझी आहे. आमच्यामध्ये पडलास तर ठार मारेल' अशी धमकी विशालने दिली. वैतागलेल्या युवतीने घटनेची तक्रार फ्रेजरपुरा ठाण्यात नोंदविल्यानंतर पोलिसांनी विशाल बाबरविरुद्ध विनयभंग, ठार मारण्याची धमकी दिल्याप्रकरणी गुन्हा दाखल केला आहे.