नागपूर : नक्षली चळवळीशी संबंध असल्याच्या आरोपावरून तुरुंगात असलेल्या वरावरा राव यांच्या जामिनाचे ५० हजार रुपये स्वीकारून त्यांना सोडण्याचे आदेश मुंबई उच्च न्यायालयाच्या नागपूर खंडपीठाने गडचिरोली सत्र न्यायालयाला दिले. जामिनाची रक्कम प्राप्त होताच ई-मेल किंवा इतर इलेक्ट्रॉनिक्स सुविधांच्या माध्यमातून त्यांच्या जामिनाचे आदेश मुंबई येथील तळोजा मध्यवर्ती कारागृहाला पाठविण्याचे निर्देशसुद्धा न्यायालयाने या आदेशामध्ये नमूद केले आहेत.

हेही वाचा - नागरिकांनो सावधान! हवामान खात्यानं दिला धोक्याचा इशारा; प्रचंड तापमानवाढीचे संकेत

वरावरा राव सध्या मुंबईतील नानावटी रुग्णालयामध्ये उपचार घेत आहेत. यापूर्वी, २३ फेब्रुवारी रोजी ८२ वर्षीय वरावरा राव यांची उच्च न्यायालयाने वैद्यकीय कारणास्तव तात्पुरत्या जामिनावर सुटका केली होती. मात्र, ते तेलंगणा येथील रहिवासी असल्याने गडचिरोली न्यायालयाने त्यांच्या जामिनाची रक्कम स्वीकारण्यास दोनदा नकार दिला होता. वरवरा राव यांची बाजू मांडताना अ‌ॅड. फिरदोस मिर्झा आणि अ‌ॅड. निहालसिंग राठोड यांनी वरावरा राव यांना येणाऱ्या अडचणी उच्च न्यायालयासमक्ष मांडल्या. याचिकाकर्ते वरावरा राव यांच्यावर मुंबई येथे उपचार सुरू असून त्यांना जामिनाची रक्कम जमा करण्याची मुदत देखील द्यावी, अशी विनंती त्यांनी उच्च न्यायालयाला केली. तसेच, मुंबई उच्च न्यायालयाने १ मार्च रोजी याच धर्तीवर दिलेला आदेश त्यांनी न्यायालयासमोर सादर केला. त्यानुसार, न्यायालयाने दोन आठवड्यांची मुदतवाढ देत जामीन देण्याचे आदेश गडचिरोली न्यायालयाला दिले. या प्रकरणी न्यायमूर्ती अनुजा प्रभुदेसाई यांच्या समक्ष सुनावणी झाली.