अमरावती ः सतत तीन दिवस सर्दी, ताप, खोकला अशी लक्षणे असतील तर प्राथमिक आरोग्यकेंद्रांतील फिव्हर क्‍लिनिककडून अशा रुग्णांची कोविड चाचणी करण्यात येत आहे. ग्रामीण भागात याची सुरुवात झाली असून नागरिकांकडून प्रतिसाद मिळत आहे. विशेष म्हणजे मागील काही दिवसांत ग्रामीण भागात कोविड रुग्णांच्या संख्येत लक्षणीय वाढ झाल्याने हा निर्णय घेण्यात आला आहे. 

जिल्हा परिषदेच्या आरोग्य विभागाकडून १४ तालुक्‍यांतर्गत ५६ प्राथमिक आरोग्यकेंद्रांमध्ये फिव्हर क्‍लिनिक उभारण्यात आले आहे. त्या अनुषंगाने सामान्य ओपीडीसोबतच फिव्हर क्‍लिनिक, असा दुसरा भाग करण्यात आला आहे. सर्दी, ताप, खोकला अशी लक्षणे नसलेल्या तसेच दुसरा आजार असणाऱ्या रुग्णांना सामान्य ओपीडीमध्ये तपासले जात आहे. तर सर्दी, ताप, खोकला असलेल्यांना फिव्हर क्‍लिनिकमध्ये पाठविण्यात येत आहे. कोविड-१९ च्या लागणपूर्वी रुग्णांना सर्दी, ताप, खोकला ही लक्षणे दिसायला लागतात. 

अवश्य वाचा- ...अन् चालकाने घेतली धावत्या रुग्णवाहिकेतून उडी, नंतर घडला हा प्रकार...
 

ग्रामीण भागात मागील काही दिवसांत कोविड रुग्णांची संख्या झपाट्याने वाढत आहे. त्यामुळे आरोग्ययंत्रणेसह नागरिकांमध्ये भीतीचे वातावरण आहे. अनेकदा सर्दी, ताप असलेले लोक डॉक्‍टरांना खरी माहिती देत नाहीत. त्यामुळे कोविडचा प्रादुर्भाव वेगाने होतो, असा अनुभव आहे. त्यावर उपाय म्हणून आता तीन दिवसांपर्यंत सर्दी, ताप, खोकल्याची लक्षणे दिसताच रुग्णांचे थ्रोट स्वॅब घेतले जात आहेत. विशेष म्हणजे अनेक ठिकाणी तर गावात दवंडी देऊन अशी लक्षणे असलेल्या रुग्णांनी कोविड टेस्ट करवून घ्यावी, असे आवाहन केले जात आहे. साधा सर्दी, ताप, खोकला असेल तर रुग्णांना औषधेसुद्धा दिली जात आहेत. 

अवश्य वाचा- भिंत खचली, चूल विझली, आता डोळ्यांमध्ये पूर!
 

तपासणी करून घेण्याचे आवाहन 

कोविडचा प्रादुर्भाव टाळण्यासाठी फिव्हर क्‍लिनिकच्या माध्यमातून थ्रोट स्वॅब घेण्याची प्रक्रिया सुरू करण्यात आली आहे. अनेक ठिकाणी सर्दी, ताप, खोकल्याची लक्षणे असलेल्या रुग्णांकडून सकारात्मक प्रतिसाद येत असून ते टेस्टसाठी तयार होत आहेत. सतत तीन दिवसांपेक्षा अधिक सर्दी, ताप, खोकला असेल तर नागरिकांनी स्वतःहून टेस्टसाठी पुढे आले पाहिजे, असे आवाहन आरोग्य विभागाच्या वतीने करण्यात आले आहे. 

संपादन ः राजेंद्र मारोटकर