नागपुरात आज एक धक्कादायक घटना उघडकीस आली आहे. एका कचऱ्याच्या ढिगाऱ्यात अर्भकं आढळून आल्याने परिसरात खळबळ माजली आहे. शहरातील लकडगंज पोलिस ठाण्याच्या (Lakadganj Police Station) हद्दीत असलेल्या Qveta कॉलोनी परिसरात, जुना देवडिया दवाखान्याजवळ भिंतीला लागून चार ते पाच अर्भक आढळून आले आहे. दुपारी 3.30 वाजता हा प्रकार उघडकीस आला. काळ्या पोलिथिनमध्ये हे अर्भक होते. त्यामुळे परिसरात एकच खळबळ माजली आहे. हे अर्भक 3 ते 5 महिन्यांचे असल्याचे प्राथमिक माहितीमधून समोर आले आहे. परिसर गजबजलेला असताना अशाप्रकारे अर्भक आढळून येणे ही बाब धक्कादायक असल्याचे समजते.

विशेष म्हणजे याठिकाणी दवाखान्यातील कचराही पडलेला आहे. घटनेची माहिती मिळताच पोलिसांचा ताफा घटनास्थळी दाखल झाला. तसेच घटनास्थळी फॉरेन्सिक ची टीमही दाखल झाली. पोलिसांनी या घटनेची गंभीर दखल घेत, तपास सुरु केला आहे. ही अर्भकं नेमकी कुठून आली? असा प्रश्न आता उपस्थित होत असून, संपूर्ण नागपुरमध्ये सध्या या विषयाची चर्चा सुरु आहे. व्यंकटेश नायडू, सुमित पडोळे, अनिल जैन, तुषार ठाकरे या चौघांनी सर्वप्रथम हे अर्भकं बघितले. दुपारी 12 वाजेच्या सुमारास कुणीतरी याठिकाणी हे अर्भकं फेकल्याचा अंदाज आहे.