भंडारा : विहिरीचे खोलीकरण करीत असताना अचानक मातीचा ढिगारा कोसळल्याने मजूर ढिगाऱ्याखाली दबला गेला; तर दोन मजूर बचावले. ही घटना शनिवारी (ता. २०) दुपारी १२ च्या सुमारास जवळच्या मुजबी येथे घडली. प्रशासनाने मदतकार्याला सुरुवात केली असून वृत्त लिहीपर्यंत मजुराला बाहेर काढण्यास यश आले नव्हते. रेवालाल भाऊलाल बारसागडे (वय ३२, रा. बीड/सितेपार) असे दबल्या गेलेल्या मजुराचे नाव आहे. तो मूळचा मध्य प्रदेशातील रहिवासी असून कामासाठी येथे आला होता.

राष्ट्रीय महामार्गावरील मुजबी येथे कोठारी मेटल कारखाना असून, या कारखान्याच्या बाजूला असलेल्या जागेत एक जुनी विहीर आहे. या विहिरीचे खोलीकरणाचे काम सुरू होते. शनिवारी या कामावर सहा मजूर होते. त्यातील तीन मजूर वरच्या भागात तर तीन मजूर विहिरीच्या आतमध्ये होते. विहिरीतील गाळ काढून ते वर फेकण्यात येत होते.

अधिक वाचा - महापालिकेवर तुकाराम मुंढेचे वर्चस्व कायम! सत्ताधाऱ्यांमध्ये अद्यापही संताप, नव्या आयुक्तांकडून निर्णयाची अंमलबजावणी

दरम्यान, दुपारी १२ च्या सुमारास खोलीकरण सुरू असताना अचानक मातीचा ढिगारा खाली कोसळला. त्यामुळे खाली असलेले तीन मजूर ढिगाऱ्याखाली दबले गेले. त्यातील दोन मजूर बाहेर निघण्यास यशस्वी ठरले. रेवालाल भाऊलाल बारसागडे हा मजूर ढिगाऱ्याखाली दबून राहिला. प्रशासनाला या घटनेची माहिती मिळताच मदतकार्याला सुरुवात झाली. दोन जेसीबी, अग्निशमन दल, आपत्ती व्यवस्थापन, वैद्यकीय चमू घटनास्थळी दाखल झाले.

दुपारपासूनच जेसीबीच्या साहायाने मजुराला बाहेर काढण्याचे प्रयत्न सुरू होते. सायंकाळपर्यंत ४० फूट खोदल्यानंतरही मजुराचा थांगपत्ता लागला नव्हता. सायंकाळी अंधार झाल्यानंतर विद्युत दिव्यांच्या मदतीने मदतकार्य सुरूच होते. जिल्हाधिकारी संदीप कदम, उपविभागीय अधिकारी मीना करनवाल, तहसीलदार अक्षय पोयाम, पोलिस पथक घटनास्थळी ठाण मांडून होते.