चांदूरबाजार (जि. अमरावती) : स्थानिक ब्राह्मणवाडाथडी मार्गावरील तीन संत्रामंडींना शनिवारी (ता. 8) सकाळी साडेनऊ वाजताच्या सुमारास आग लागली. ही आग शॉर्टसर्किटमुळे लागल्याचा प्राथमिक अंदाज असून यात सुमारे 80 लाखांचे नुकसान झाले.
संत्र्याची मुख्य बाजारपेठ म्हणून चांदूरबाजारची ओळख आहे. त्यामुळे शहरातील ब्राह्मणवाडाथडी मार्गावर दरवर्षी सात ते आठ संत्रामंड्या उभारण्यात येतात. शनिवारी सकाळी साडेनऊ वाजता अब्दुल सलीम शेख इकरीद यांची एक, तर अतिक अहमद सईद अहमद यांच्या दोन संत्रामंडींना आग लागली. यामध्ये अब्दुल सलीम शेख इकरीद यांच्या मंडीतील 30 लाख रुपये किमतीचे 35 हजार कॅरेट, 3 लाख रुपये किमतीचे टीनशेड व वजनकाटा जळून खाक झाला. तर, अतिक अहमद यांच्या दोन संत्रामंडीत संत्राबहार संपल्याने 16 टन टरबूज ठेवण्यात आले होते. येथील आगीत 8 लाख रुपये किमतीचे 11 हजार कॅरेट जळून खाक झाले. त्याचबरोबर 12 लाख रुपये किमतीची संत्रा वॅक्‍सिन मशीन, 8 लाख रुपये किमतीचे टीनशेड व दीड लाखाचे टरबूज जळून खाक झाले. ही आग शॉर्टसर्किटने लागली असल्याचा प्राथमिक अंदाज व्यक्त केला जात आहे. चांदूरबाजार येथील अग्निशमन दल, एच.जी. इन्फ्रा कंपनीच्या दोन टॅंकरसह अचलपूर येथील अग्निशमन दलाच्या गाड्यांनी आग विझविली.