अमरावती ः घर खरेदी करून देण्यासह प्लॉट विक्रीचे आमिष दाखवून एका त्रिकुटाने वरुड येथील चौघांची 28 लाख 43 हजारांनी फसवणूक केली. वरुड पोलिसांनी तिघांविरुद्ध अपहार, फसवणुकीसह जीवे मारण्याची धमकी दिल्याप्रकरणी गुन्हा दाखल केला. 

दीपक शिवरारायण बटवाडा, प्रवीण धरमठोक व एक महिला (सर्व रा. वरुड) अशा तिघांविरुद्ध गुन्हा दाखल झाल्याचे पोलिसांनी सांगितले. महेंद्र गंगाधर काठीवाले (वय 35, रा. वरुड) यांच्या तक्रारीवरून वरुड पोलिसांनी हा गुन्हा दाखल केला. श्री. काठीवाले यांची आई आणि दोन बहिणी यांना घर खरेदी करण्याचे कारण सांगून तिघींजवळून 19 लाख 53 हजार रुपये किंमतीचे 65 तोळे सोन्याचे दागिने घेतले. 

जाणून घ्या -  'तिच्या' घरी सुरु होती लग्नाची लगबग पाहुणेही होते तयार; तेवढ्यात आला फोन अन् एका क्षणात सगळंच संपलं 

याव्यतिरिक्त सुजित मारोतराव खेर्डे (वय 47), विकास टेमघरे (वय 48) व योगेश विष्णुपंत गणोरकर (वय 47) या तिघांना प्लॉट विक्री करण्याचे कारण सांगून त्यांच्याकडून एकूण 8 लाख 90 हजार रुपये घेतले. चौघांकडून 28 लाख 43 हजारांचा ऐवज हडपून फसवणूक केल्याचा आरोप आहे. नमूद तिघांनी संबंधितांकडे पैशाची मागणी केली असता त्यांनी अनेकांना जीवे मारण्याची धमकी दिल्याचा आरोप आहे. 

बनावट फेसबुकवरून पैसे वसुली

डॉ. जयंत पंडित काशीकर (वय 40, रेणुकानगर, वरुड) यांच्या नावाने बनावट फेसबुक अकाउंट तयार करून त्यांच्या ओळखीतील अनेकांना फ्रेण्ड रिक्वेस्ट पाठवली. ज्यांनी फ्रेण्ड रिक्वेस्ट स्वीकारली त्यापैकी अनेकांना तोतयाने विविध कारणे सांगून पैशाची मागणी केली. डॉ. काशीकर यांचे मित्र पंकज मनोहर जावळे यांनी तोतयाची फ्रेण्ड रिक्वेस्ट स्वीकारून त्याला पाच हजार रुपये ऑनलाइन पाठविले. आपल्या नावाचा गैरवापर करीत असल्याचे उघडकीस येताच डॉ. काशीकर यांनी पोलिसांत तक्रार केली. वरुड पोलिसांनी अनोळखी व्यक्तीविरुद्ध फसवणुकीचा गुन्हा दाखल केला. 

जाणून घ्या - 'त्या' चौघांचे मृतदेह बघून आई-वडिलांनी फोडला टाहो; हिवरा-हिवरी गावात पसरली शोककळा; सरपंचांनाही अनावर झाले अश्रू

फसवणूकप्रकरणी तिघांविरुद्ध गुन्हा दाखल झाल्यामुळे याप्रकरणाची सखोल चौकशी केली जाईल.
-श्रेणिक लोढा, 
परिविक्षाधीन आयपीएस, पोलिस निरीक्षक वरुड.

संपादन - अथर्व महांकाळ