कुही (जि.नागपूर) ः जिल्हयात कुठे ना कुठे वाघ दिसत असल्याच्या घटनांचे सत्र सुरूच असून यात वाघाने शिवारातील गुरांढोरांच्या नरडीचे घोट घेण्याच्या घटनांमुळे शेतक-यांचे आता शेतात जाणेही मुश्‍किल केले आहे. तालुक्‍यातील उमरेड-कऱ्हांडलाच्या गोठणगाव प्रवेशद्वाराच्या परिसरातील रेगातूर-दहेगाव रस्त्यावर सकाळी, तर चिकनानजीकच्या धरमखिंडी रस्त्यावर सायंकाळी वाघ दिसल्याने गावकऱ्यांची मोठी फजिती होत आहे. नागरिकांची कामे रेंगाळली आहेत. एका गावावरून दुसऱ्या गावाला जाण्यास नागरिक टाळाटाळ करीत आहेत.

क्‍लिक करा- अन्‌ बोलेरोने अडविला पाच कोटीच्या सिगारेट भरलेला कंटेनर

मुलांनी काढला पळ
कुही तालुक्‍यातील अभयारण्यालगतच्या गावांत वाघ नेहमीच दिसत आहे. यासोबत पाठलाग करणे, माणसांवर व जनावरांवर हल्ला करणे व त्यांची शिकार करणे हे प्रकार यापूर्वीही अनेकदा घडले आहेत. यापूर्वी दहेगाव येथील एका महिलेवर व एका वृद्धावर हल्ला करून वाघाने त्यांचा जीव घेतला आहे. सोमवारी रेगातूर-दहेगाव रस्त्यावरच्या बारतीनचा पाट परिसरात सकाळी मुले व्यायामाला गेली असता त्यांना वाघ दिसला. घाबरून मुलांनी पळ काढला. तीन दिवसांपासून मुले पुन्हा व्यायामासाठी गेली नसल्याचे दहेगावचे सरपंच जितू गोंडाने यांनी सांगितले.

क्‍लिक करा - उद्‌धव सरकार, प्रकल्पांचा प्रश्‍न काही सुटेचिना !

अर्धा तास पाठलाग केला
मंगळवारी सायंकाळी चिकना येथील मंगेश शेंडे यांचा वाघाने सुमारे अर्धा किमीपर्यंत पाठलाग केला. या मार्गाने जाण्यास भीती वाटत असून, रात्रीच्या ड्यूटीसाठीही दिवसाच घरून निघत असल्याचे मंगेश यांनी सांगितले. बुधवारी सायंकाळी पुन्हा धरमखिंडीवर वाघाने रस्त्यावरच ठाण मांडले होते. चिकनाकडे जाताना येथील शैलेश जुमडे, बबलू जुमडे व शेतमजूर महिलांना वाघ दिसल्याने त्यांची बोबडी वळली होती. बस, दुचाकीस्वार, चारचाकी व वाहनांसह सुमारे दोनशे लोक या रस्त्यावर गोळा झाले होते. मात्र, वाघ रस्ता सोडत नसल्याने बराच वेळ त्यांना थांबून राहावे लागले. बऱ्याच वेळेनंतर वाघ धरमखिंडी जंगलात गेल्यावर सर्वांनी सुटकेचा नि:श्‍वास सोडला. या घटनेनंतर या परिसरातील शेतात कामासाठी मजूर नकार देत आहेत. शेतकरीदेखील शेतात जाण्यास घाबरत आहेत.