जवाहरनगर (जि. भंडारा) : परिसरातील पेट्रोल पंप (ठाणा) येथील महात्मा फुले वॉर्डात मातेने दोन चिमुरड्यांना विष देऊन (Poison given to children) स्वतः आत्महत्येचा प्रयत्न (Mother attempted suicide) केला. यातील एक वर्ष वयाचा बालक दगावला (Death of a child) तर आई व मुलीवर नागपूर येथील रुग्णालयात उपचार सुरू आहेत. मृत बालकाचे नाव कार्तिक ज्ञानेश्‍वर शहारे असे आहे.

ठाणा पेट्रोल पंप येथे महात्मा फुले वॉर्डात ज्ञानेश्वर शहारे हे आई, पत्नी वंदना, मुलगी विधी आणि मुलगा कार्तिक यांच्यासह राहतात. धान्याला कीड लागू नये यासाठी त्यांनी कृषी केंद्रातून कीटकनाशक पावडर आणली होती. सोमवारी (ता. १३) रात्री वंदनाने पाण्यात मिसळून ही पावडर मुलांना दिली व स्वत:सुद्धा घेतली. यामुळे तिघांचीही प्रकृती बिघडली.

त्यांना अत्यवस्थ स्थिती पाहून घाबरलेल्या ज्ञानेश्‍वरने मित्रांच्या मदतीने उपचारासाठी जिल्हा सामान्य रुग्णालय भंडारा येथे दाखल केले. त्यांची गंभीर स्थिती पाहून वंदना, मुलगी विधी व मुलगा कार्तिक यांना पुढील उपचारासाठी नागपूरला हलविण्यात आला. विधीला नागपूरच्या मेयो रुग्णालयात तर वंदना व कार्तिकला नागपूरच्या मेडिकल कॉलेज इस्पितळात दाखल करण्यात आले. मात्र, तेथे रात्री कार्तिकचा मृत्यू झाला. वंदना व विधीवर उपचार सुरू आहेत.

मिळालेल्या माहितीनुसार, ज्ञानेश्वर हा पूर्वी गॅस सिलिंडर वाटपाचे काम करीत होता. सध्या तो आयुध निर्माणी येथे रोजंदारीवर कामावर जातो. पत्नी घरकाम करते तर ज्ञानेश्वरची आई आयुध निर्माणीतून निवृत्त झाली आहे. ज्ञानेश्‍वरच्या कुटुंबात कधीही साधे भांडण नाही, असे शेजारी सांगतात. त्यामुळे वंदनाने कोणत्या कारणावरून मुलांना विष देऊन स्वत: आत्महत्येचा प्रयत्न केला, हे अद्याप गुलदस्त्यातच आहे. घटना रात्रीची असल्याने घराशेजारच्यांना घटनेची माहिती सकाळी कळली.

ओवाळणाऱ्या हातांनीच दिले विष

आईने विष दिल्यामुळे दगावलेला कार्तिक केवळ एक वर्षाचा होता. त्याचा पहिला वाढदिवस ३० ऑक्टोबरला कुटुंबाने साजरा केला होता. ज्या आईने वाढदिवसाच्या दिवशी ओवाळले व अभीष्ट चिंतन केले त्याच आईने स्वतःच्या हाताने त्याला विषारी पाणी पाजून मृत्यूच्या दारात पोहोचवले.