आसेगावपूर्णा : चांदूर बाजार तालुक्यातील टाकरखेडा पूर्णा येथे जावयाने सासरवाडीत येऊन घरात सासू व पत्नीशी क्षुल्लक कारणांवरून वाद घालून कुऱ्हाडीने हल्ला सासूची हत्या केली तर या हल्ल्यात पत्नी गंभीररीत्या जखमी झाल्याची खळबळजनक घटना घडली.

पद्मा उर्फ रुक्माबाई विनायकराव इंगळे (वय ४५) असे हत्या झालेल्या महिलेचे नाव असल्याचे अधिकाऱ्यांनी सांगितले. टाकरखेडा पूर्णा येथे शुक्रवारी (ता. २८) ही घटना घडली. संशयित दिनेश भानुदास बोरखडे ( वय ३० रा. दर्यापूर जवळ पेठ ईदबारपूर ) असे हल्लेखोराचे नाव असल्याचे पोलिसांनी सांगितले.

आईची प्रकृती बरी नसल्याने मुलगी आठ दिवसांपूर्वीच माहेरी आली होती. शुक्रवारी दुपारी दोन वाजताच्या सुमारास जावई टाकरखेडा पूर्णा येथे सासरवाडीत आला. दिनेशने पत्नीशी वाद घालायला सुरुवात केली. जावई व पत्नीमध्ये सुरू असलेला वाद मिटविण्यासाठी मध्यस्थी आलेल्या सासूवर त्याने अचानक कुऱ्हाडीने वार करून खून केला. पद्मा उर्फ रुक्माबाई विनायकराव इंगळे यांचा जागीच मृत्यू झाला. पत्नी स्नेहल दिनेश बोरखडे ( वय २५) हिच्या डोक्यावरही कुऱ्हाडीने वार करून जखमी करण्यात आले. हल्ल्यानंतर जखमींनी आरडाओरडा केल्याने संशयित दिनेश बोरखडेने येथून पळ काढला.

दिनेशची जखमी पत्नी स्नेहल दिनेश बोरखडे हिने आसेगाव पोलिसांत तक्रार दाखल केली. तक्रारीवरून पोलिसांनी पसार संशयित दिनेश बोरखडेविरुद्ध खुनाचा गुन्हा दाखल करण्याची कारवाई सुरू केली होती. घटनास्थळी उपविभागीय पोलिस अधिकारी सूर्यकांत जगदाळेंसह ठाणेदार किशोर तावडे यांनी भेट दिली.

मृतदेहासह नातेवाइकांचा ठाण्यात ठिय्या

खूनाच्या घटनेनंतर संतप्त नातेवाईकांनी मृतदेहासह आसेगावपूर्णा ठाण्यात धाव घेतली. सासू व पत्नीवर हल्ला करून फरार झालेल्या संशयितास जोपर्यंत अटक होत नाही तोपर्यंत मृतदेह न हलविण्यावर नातेवाईक ठाम होते. त्यामुळे पोलिसांपुढे पेच निर्माण झाला होता. ठाणेदार किशोर तावडे यांनी पसार दिनेशला अटक करण्याचे आश्वासन दिल्यानंतर रोष शांत झाला.