मूल (जि. चंद्रपूर) : वडिलोपार्जित शेतीच्या हिस्सेवाटणीचा जुना वाद उफाळून आल्याने लहान भावाने मोठ्या भावाचा कुऱ्हाडीने वार करून खून केला. ही खळबळ जनक घटना तालुक्यातील सिंताळापासून १ किमी अंतरावर असलेल्या येरगाव मार्गावरील नाल्याजवळ बुधवारी (ता. ४) सकाळी साडेअकरादरम्यान घडली. आरोपीने स्वतःच मूल पोलिस ठाणे गाठले.

पोलिसांनी दिलेल्या माहितीनुसार, सुनील पुंजाराम वैरागडे (वय ४२) असे आरोपीचे नाव आहे. तर खून झालेल्या मोठ्या भावाचे नाव विश्वनाथ पुंजाराम वैरागडे (वय ६५) आहे. सिंताळा येथील विश्वनाथ वैरागडे आणि सुनील वैरागडे या सख्ख्या भावांमध्ये वडिलोपार्जित शेतीचा वाद सुरू होता. हिस्सेवाटणीवरून अनेकदा खटके उडत होते. याबाबत मूल पोलिस ठाण्यात २०१९ मध्ये या दोन भावांबाबत अदखलपात्र गुन्ह्याची नोंद आहे.

बुधवारी सकाळी साडेअकराच्या दरम्यान विश्वनाथ हे जंगलात जनावरे चरावयासाठी नेत असताना पाठीमागून येऊन सुनीलने कुऱ्हाडीने डोक्यावर वार केले. कुऱ्हाडीचा जबर मार लागल्याने विश्वनाथ यांचा घटनास्थळीच मृत्यू झाला. येरगाव मार्गावर खून झाल्याची माहिती गावात पोहोचली. घटनास्थळी नागरिकांचा जमाव झाला. घटनेनंतर आरोपी सुनीलने स्वतःच मूल पोलिस ठाणे गाठून गुन्ह्याची कबुली दिली.

सहायक पोलिस निरीक्षक प्रशांत ठवरे यांनी सहकाऱ्यांसह घटनास्थळ गाठून पंचनामा केला. मृतदेह मूल उपजिल्हा रुग्णालयात पाठविला. दरम्यान, तपासानंतर आरोपी सुनील वैरागडेविरुद्ध खुनाचा गुन्हा दाखल करून अटक करण्यात आली. तपास सहायक पोलिस अधीक्षक अनुज तारे यांच्या मार्गदर्शनाखाली सहायक पोलिस निरीक्षक प्रशांत ठवरे करीत आहेत.