वर्धा : येथील नागठाणा शिवारात शनिवारी (ता. २०) सेवानिवृत्त जवान विजय गणवीर यांचा मृतदेह आढळून आला होता. या प्रकरणी घातपाताचा संशय व्यक्‍त करण्यात आल्याने पोलिसांनी तपास केला असता त्यांचा अनैतिक संबंधातून खून झाल्याचे उघड झाले आहे. यात मृताच्या पत्नीसह तिचा प्रियकर रामेश्‍वर आघाव आणि एका सहकारी महिलेला अटक करण्यात आली आहे.

पोलिसांनी दिलेल्या माहितीनुसार, सेवानिवृत्त जवान विजयच्या पत्नीचे बोरगाव येथील रामेश्वर आघाव याच्याशी सूत जुळले होते. शनिवारी विजय नागपूर येथे सैनिक कॅन्टीनमध्ये खरेदीसाठी गेला होता. विजय नेहमी उशिरा येत असल्याने तिने रामेश्वरला घरी बोलावून घेतले. एरवी उशिरा येणारा विजय शनिवारी दुपारीच घरी आला. पत्नीला परपुरुषासोबत पाहून त्यांच्यात वाद झाला. दरम्यान, जाडसर वस्तूने डोक्‍यावर वार करून त्याला गंभीर जखमी केले. यातच विजयचा मृत्यू झाला.

अधिक वाचा - आता १ नव्हे तर ४ वाजेपर्यंत सुरू राहणार दुकाने; सोमवारपासून होणार पुढील बदल

घटनेची माहिती मिळताच पोलिसांनी मृत विजयच्या पत्नीला ताब्यात घेतले. चौकशी केली असता रामेश्वर आघाव तसेच संध्या जोगे यांच्या मदतीने हे घडवून आणल्याचे सुनीता हिने चौकशीत कबुली दिली. प्रकरणी तिघांनाही अटक करण्यात आली आहे.