नागपूर ः उन्हाळ्याच्या दिवसात शाळांमध्ये दहावी आणि बारावीचे पेपर सोडवायचे आहे. मात्र, या दिवसात ग्रामीण भागातील बत्तीगुल होत असल्याने विद्यार्थ्यांनी पेपर कसा सोडवायचा असा प्रश्न निर्माण झाला आहे. या विरोधात आता शिक्षक संघटना सरसावल्या असून विदर्भातील विद्यार्थ्यांचे पेपर सकाळच्या सत्रात घेण्याची मागणी करण्यात आली आहे. याबाबत सोमवारी संघटना निवेदनही सादर करणार आहेत.

दरवर्षी बारावीची परीक्षा फेब्रुवारी ते मार्चदरम्यान होत असते. तसेच १ ते २५ मार्चदरम्यान दहावीची परीक्षा घेण्यात येते. मात्र, कोरोनामुळे यावर्षी २३ एप्रिल ते २१ मेदरम्यान बारावी तर २९ एप्रिल ते २० मेदरम्यान दहावीचे पेपर घेण्यात येणार आहे. या महिन्यांमध्ये विदर्भात राज्याच्या तुलनेत उन्हाचा पारा ४८ पर्यंत जातो. त्यामुळे पेपर सोडविताना विद्यार्थ्यांना चांगलाच घाम फुटणार आहे. 

कोरोनाबाधितांच्या नातेवाइकांची रात्र फुटपाथवर; रात्री...

विशेष म्हणजे शहरी भागात सुविधा असलेल्या शाळा असल्या तरी, ग्रामीण भागातील विजेची समस्या मोठी आहे. प्रत्येकच दिवशी तालुक्यात विजेची समस्या असते. त्यामुळे ज्या शाळांमध्ये विद्युत पुरवठा आहे, मात्र, विजेअभावी त्या शाळेमधील विद्यार्थ्यांना उन्हाचे चटके बसणार आहे. त्यामुळे अशा परिस्थितीत ४५ पेक्षा अधिक तापमानात विद्यार्थी कसा तीन तास काय पेपर देईल, याबाबत साशंकता आहे. 

विद्यार्थ्यांच्या तब्येती बिघडल्यास जबाबदार कोण? असा प्रश्न शिक्षक संघटनांनी उपस्थित केला आहे. उन्हामुळे विद्यार्थ्यांची तब्येत खराब होण्याची शक्यता आहे. त्यामुळे त्याच्या परीक्षांवरही परिणाम होण्याची शक्यता नाकारता येत नाही.

शहरात लॉकडाउन, मिनी लॉकडाउन की कठोर निर्बंध? ठिकठिकाणी...

ग्रामीण भागात नेहमीच विजेची समस्या आहे. प्रत्येक तालुक्यात विज सतत जात असते. त्यामुळे परीक्षेच्या काळात विद्युत पुरवठा नियमित व्हावा अशी मागणी आहे. याशिवाय उन्हाळ्यात परीक्षा होत असल्याने सकाळी ९ ते १२ अशी वेळ ठेवण्याची मागणी करण्यात येणार आहे.
अनिल गोतमारे,
 जिल्हाध्यक्ष, विदर्भ माध्यमिक शिक्षक संघ 

संपादन - अथर्व महांकाळ