Nagpur : योग्यता प्रमाणपत्र नसतानाही शहरात बिनधास्तपणे स्कूल व्हॅन धावत आहे. मुलांचा जीव धोक्यात घालून वाहने चालविणाऱ्या गाड्यांवर शहरातील विविध भागात प्रादेशिक परिवहन विभाग व वाहतूक पोलिस विभागाकडून सोमवारी कारवाई करण्यात आली. यात ३६ वाहनांनी नियमांचे उल्लंघन केल्याने कारवाई करून वाहने जप्त करण्यात आली.

स्कूल बस सुरक्षितता समितीची बैठक पोलिस आयुक्त अमितेशकुमार यांच्या अध्यक्षतेखाली शुक्रवारी पार पडली. विद्यार्थ्यांना शाळेत घेऊन जाणाऱ्या वाहनांचा आढावा घेण्यात आला. त्यात शहर व ग्रामीण भागातील ३ हजार ७५७ स्कूल बस व व्हॅनपैकी ७६२ वाहनांना योग्यता प्रमाणपत्र (फिटनेस सर्टिफिकेट) नसल्याचे पुढे आले.

याची गंभीर दखल घेऊन सोमवारपासून संयुक्त मोहीम राबविण्याचा सूचना करण्यात आल्या. त्यानुसार, सोमवारी शहरात विविध ठिकाणी स्कूल बस, व्हॅन, खासगी बस व ऑटोरिक्षाची तपासणी करण्यात आली. दिवसभरात १३ बसेस व २३ ऑटोरिक्षात दोष आढळून आल्या. या सर्व वाहनांना अडकवून ठेवण्यात आले.

ज्यांनी दंड भरला त्यांना नंतर सोडून देण्यात आले. यात १३ स्कूल बसेस जप्त करण्यात आल्या. काही ऑटोमध्ये मुलांना अक्षरशः कोंबून घेऊन जात असल्याचे आढळून आले आहे. विद्यार्थ्याची वाहतूक करताना पालकांनी वाहन चालक, वाहनाची योग्यता याची खातरजमा करावी.

कुठेही दोष आढळल्यास प्रादेशिक परिवहन विभाग किंवा संबंधित पोलिस ठाण्यात पालकांनी तक्रार द्यावी, अशा सूचना उपप्रादेशिक परिवहन अधिकारी रवींद्र भुयार यांनी केल्या.